Wednesday, 8 January 2014

ಕೈಯ್ಯ ಹಿಡಿದ ದೇವತೆ

ರಾತ್ರಿಯಿಡಿ ಕೆಮ್ಮುತ್ತಿದ್ದ
ಪಾಪುವಿನ ಎದೆಗೆ
ನೀವಿದ ತೈಲದ ಘಮಲು
ಆ ತಾಯಿಯ ಕೈಯ್ಯಿಗೆ
ಅಂಟಿಯೇ ಇತ್ತು
ಕೆಮ್ಮು ನಿವಾರಣೆ ಆಗುವನಕ

ಜಾರಿದ ಸಿಂಬಳವ ತಡೆದು
ಒರೆಸಿದ ಸೆರಗಿನ
ಅಂಚಿನ ಸುಕ್ಕನು
ಬಿಡಿಸುವ ಮುನ್ನ
ಮತ್ತೆ ಒದ್ದೆ ...
ತಾಯಿಯ ಚಿಂತೆ, ಮಗುವಿನದ್ದೇ

ಹಣೆಯ ಮುದ್ದಿಸುವ ಸರದಿಯಲಿ
ಕೈ ಬೆರಳ ಸೋಕಿಗೆ
ಬಿಸಿ ಸ್ಪರ್ಶವಿತ್ತ ಜ್ವರಕೆ
ತಾಯಿಯ
ಎದೆ ಬಿಸಿಯೇ
ಸರಿ ಮದ್ದು

ಹೊತ್ತ ಹರಕೆಗೆ
ಚಿನ್ನದ ಮೂಗುತ್ತಿಯನೂ ಬಿಡದೆ
ದಾನವನಿತ್ತಳು
ಒಂದೊತ್ತಲೇ
ತಿಂಗಳೆಲ್ಲ ಕಳೆದು

ರಾತ್ರಿಯ ಹಗಲಿಗೆ
ಪರಿಚಯಿಸಿದಳು
ಆರಿಸದೆ ಬುಡ್ಡಿ ದೀಪದ ಬೆಳಕ
ಬೆಳಕು ಹರಿದ ಪರಿವೇ ಇಲ್ಲದೆ
ಎಚ್ಚರವಿದ್ದಳು
ರಾತ್ರಿ ತನಕ

ಜೊತೆಗೇ ಇರುವ
ದೇವಸ್ಥಾನ
ಬಿಡದೆ ಕೈಯ್ಯ
ಹಿಡಿದ ದೇವತೆ
ತಾಯಿ ಇರಲು
ಕಂದನ ಜೊತೆಗೆ 
ನಿದ್ದೆಗೂ ಕೂಡ
ನಿಶ್ಚಿಂತೆ !!

          -- ರತ್ನಸುತ 

No comments:

Post a Comment

ನೀರವ ಸ್ಥಿತಿಯಲ್ಲಿ ಯಾರಿವನೆನ್ನದಿರು

ನೀರವ ಸ್ಥಿತಿಯಲ್ಲಿ ಯಾರಿವನೆನ್ನದಿರು ನೀನಿರದೆ ಈ ಗತಿ ಸಿದ್ಧಿಸಿತು ಜೀವಕೆ ಹಾಡುಹಗಲಲ್ಲಿ ನೀ ಆವರಿಸಿಕೊಂಡಿರುವೆ ಕನಸೊಂದು ಬೀಳುತಿದೆ ಗೊತ್ತಿದ್ದೂ ಬಾವಿಗೆ ಬ...