Tuesday, 14 January 2014

ನನ್ನ ನಿನ್ನ ಕವನ

ನಿನ್ನ ನಗುವಿನೊಳಗೊಂದು ಸಾಗರ 
ಈಜಿ ಬರುವುದೇ ಸಾಹಸವು 
ನಿನ್ನ ಅಧರದಲಿ ಜೇನ ಬುತ್ತಿಯಿದೆ 
ನನ್ನ ಅಧರಕೀಗ ಹಸಿವು 

ನಿನ್ನ ಕರಗಳಲಿ ಬಂದಿ ಮೆಹೆಂದಿಯ 
ಒಂದು ರೇಖೆ ನಾನಾಗಿರುವೆ 
ಕಣ್ಣು ಜಾರಿಸುವ ಹನಿಯ ಗುರುತುಗಳ 
ಚಾಚು ತಪ್ಪದೆ ಪಾಲಿಸುವೆ 

ನಿನ್ನ ಮುಂಗುರಳ ರಿಂಗಣದ ಸಾಲು 
ಮತ್ತು ಬಡಿಸಿಕೊಳ್ಳುವ ಕೆನ್ನೆ
ಮೆಲ್ಲ ಪಿಸು ಮಾತನೊಂದ ನುಡಿವಾಗ 
ಕಿವಿಯ ಮರೆಗೆ ಸಿಕ್ಕಿಸಲೇನೆ?

ಕತ್ತಲ ಕೆಣಕಿ ಉರಿದ ಹಣತೆಯಲಿ 
ಸೊಕ್ಕು ತುಂಬಿದ ಮೌನವಿದೆ 
ಗುಟ್ಟುಗಳ ಹೊತ್ತು ದಿಕ್ಕಿನಲಿ ನಿಂತು 
ಮಿಥುನ ದೀಕ್ಷೆಗೆ ಬೇಡುವುದೇ?

ಈ ಭಯ ಸಹಜ, ಮೀರಿದ ಬಳಿಕ 
ನೀನಿದ ಆಟವೆಂದರಿವೆ 
ಅಂಗವ ದಾಟಿ ಸಂಗವ ಕಟ್ಟಿ 
ಅಂತರಂಗವ ಸಂದಿಸುವೆ 

ಮಾತಲಿ ಮರುಗಿ, ಕೂತಲೇ ಕೊರಗಿ- 
ಉಳಿದಲ್ಲಿ ಸಾಧ್ಯವೇ ಮಿಲನ 
ನನ್ನ ಬೆನ್ನ ಹಿಂದೆಯೇ ನಿನ್ನ 
ಸಾಲೊಂದು ಸಿಕ್ಕರದುವೇ ಕವನ!!

                                 -- ರತ್ನಸುತ   

No comments:

Post a Comment

ನೀರವ ಸ್ಥಿತಿಯಲ್ಲಿ ಯಾರಿವನೆನ್ನದಿರು

ನೀರವ ಸ್ಥಿತಿಯಲ್ಲಿ ಯಾರಿವನೆನ್ನದಿರು ನೀನಿರದೆ ಈ ಗತಿ ಸಿದ್ಧಿಸಿತು ಜೀವಕೆ ಹಾಡುಹಗಲಲ್ಲಿ ನೀ ಆವರಿಸಿಕೊಂಡಿರುವೆ ಕನಸೊಂದು ಬೀಳುತಿದೆ ಗೊತ್ತಿದ್ದೂ ಬಾವಿಗೆ ಬ...