ಒಂದಿಷ್ಟು ಹೂವನ್ನು ಒಂದು ಮಾಡಿ

ಒಂದಿಷ್ಟು ಹೂವನ್ನು ಒಂದು ಮಾಡಿ
ಖಾಲಿ ಪುಟವನ್ನು ತುಂಬುತಿರುವೆ
ಕಂಡಷ್ಟೂ ಕನಸಲ್ಲಿ ಹೆಕ್ಕಿ ತಂದ
ಬಣ್ಣಗಳ ಕುಂಚಕ್ಕೆ ಮಾರುತಿರುವೆ
...

ಮೂಡುವ ಚಿತ್ರದ ಅಡಿಯಲ್ಲಿ ಸಂಕೋಚ
ಗುರುತನ್ನು ಗೀಚದೆ ಬಿಟ್ಟು ಬಿಡುವೆ
ತಂಗಾಳಿ ಸೋಕಿದ ಮಧುವನ್ನು ಪರಿಚಯಿಸಿ
ಇಷ್ಟಕ್ಕೆ ಎಲ್ಲವನೂ ತೇಲಿ ಬಿಡುವೆ


ಬಣ್ಣ ತಾಳಿದ ಚಿತ್ರ ತಾಳಬಲ್ಲದೇ ನಿನ್ನ?
ಕೇವಲ ಬಣ್ಣನೆಗೇ ನಾಚುತಿತ್ತು
ಎಲ್ಲ ರೇಖೆಯ ಮೂಲ ನಿನ್ನ ನೆನೆಪಿನ ಹಿಂದೆ
ಇರುವೆ ಸಾಲಿನ ಹಾಗೆ ಸಾಗುತಿತ್ತು


ಮತ್ತೆ ಗಡಿಯಾರ ಕತ್ತಲನು ಕಾಯುತಿದೆ
ದಾಪುಗಾಲಿಗೆ ಅಂಗ ವೈಕಲ್ಯವೇ?
ಬಿಡಾರ ಹೂಡಿದ ಭಾವಗಳ ಸರಣಿಯಲಿ
ಮೌನವಾದರೂ ಅದು ಕೌಶಲ್ಯವೇ..


ಕಣ್ಣರಳಿಸಿಕೊಂಡ ಹೃದಯದ ಬಡಿತಕ್ಕೆ
ಲಯ ತಪ್ಪಿಸಿದ ಔದಾರ್ಯತೆ ನಿನದು
ಅರೆ ಹುಚ್ಚು ಹಿಡಿದವನ ಮೊಂಡು ಪದ್ಯಗಳನ್ನು
ಮನಸಾರೆ ನೀ ಸುಟ್ಟು ಸುಖಿಸಬಹುದು


ಮತ್ತೆ ಬರೆಯುತಲಿರುವೆ ನಿನ್ನ ಸಿಟ್ಟಿಗೆ ಸಿಗಲು
ಸಿಕ್ಕಾಗ ಸಲುಗೆಯನು ಕೊಡಲೇ ಬೇಡ
ನಸು ನಕ್ಕು ನಾಚಿಕೆಯ ಪಸರಿಸಿ ಬಿಡುವಂಥ
ಅಪರಾಧ ಕೃತ್ಯವನು ಎಸಗ ಬೇಡ...