ಅಪ್ಪ, ಅಮ್ಮ

ಅಪ್ಪ
ನೀನು ಒರಗಿದ ಹಾಸಿಗೆ ಮೇಲೆ
ಒಮ್ಮೆ ಮಲಗಿ ನೋಡೋಣವೆಂದು
ಹಾಗೇ ಒಮ್ಮೆ ಹೊರಳಿಕೊಂಡೆ
ನಿದ್ದೆಯ ನಂಟೇ ತೊರೆದಂತಾಯ್ತು...
ಇರುಳು ತೀರದ ಸವಾಲಾಯ್ತು
ಬುದ್ಧಿಗೆ ಮಂಕು ಬಡಿದಂತಾಯ್ತು
ಆದರೂ ಹೇಗೆ ನಗುತಲೇ ಉಳಿವೆ?

ಅಮ್ಮ
ನೀನು ಸೌಟು ಹಿಡಿದು ಕಲೆಸಿ
ಮುಂಗೈ ರುಚಿಗೆ ಸಾರು ಸುರಿದದ್ದ ಪುನರಾವರ್ತಿಸಿದೆ
ಅದೆಷ್ಟು ಬಿಸಿ ಅಂಚು?
ಅದೆಷ್ಟು ಪಕ್ವ ರುಚಿ?
ಆದರೂ ನಿನಗೇಕೋ ಅಸಮಾದಾನ
ಎಂದೋ ಮಾಸಿದ ರುಚಿಯನ್ನೇ ನೆನೆಯುತ್ತ!
ದೂರ ನಿಂತು ನೋಡಿದಾಗ ಅನಿಸಿದ್ದು
ನಿಮ್ಮ ಕಷ್ಟಗಳೆಲ್ಲ ಸೊನ್ನೆ,
ನಿಮ್ಮಲ್ಲಿ ಬೆರೆತಾಗಲೇ ಪಾಠ ಕಲಿತೆ
ಕಂಡುಕೊಳ್ಳುತ್ತ ನನ್ನನ್ನೆ!