ಹೆಗಲ ಏರಿದ ಚಿಂತೆ ಹಗುರಾಗುವಾಗ

ಹೆಗಲ ಏರಿದ ಚಿಂತೆ ಹಗುರಾಗುವಾಗ
ಮೊಗವ ಹಿಡಿಯುತ ನಿಂತೆ ಕಣ್ಣಿನೊಳಗೆ
ಬಿಗಿ ಹಿಡಿದ ಅಳುವೊಂದು ಎದೆಯಲ್ಲಿ ಇಣುಕಿದೆ
ತಡೆಯಿರದ ಕಂಬನಿ ಕಣ್ಣ ಹೊರಗೆ

ಮುತ್ತಿಡುವ ಕೆನ್ನೆಗೆ ಮೆತ್ತಿರುವ ಪಸೆಯನು
ಹುಸಿಗೊಳಿಸುವಂತೆ ಆಟವ ಕಟ್ಟುವೆ
ಎಲ್ಲ ಕಥೆ ಮೊದಲಾದದ್ದೊಂದಾನೊಂದೂರಿಂದ
ಊರಾಚೆಗೆ ನಿನ್ನ ಗಮನವಿಡುವೆ


ದೂರದ ಬೆಟ್ಟವು ನುಣ್ಣಗೆ ಕಂಡರೂ
ನಿನಗೋ ಕಾಲಡಿಯ ಮಣ್ಣ ವ್ಯಾಮೋಹ
ಬೆಲೆಗೆ ನಿಲುಕದ ಆಟಿಕೆ ಎದುರಿಟ್ಟರೂ
ಅಡುಗೆ ಬಟ್ಟಲು-ಸೌಟೆಡೆಗೆ ನಿನ್ನ ಸ್ನೇಹ


ಗೂಡು ಕಟ್ಟುವಾತುರಕ್ಕೆ ರೆಕ್ಕೆ ಕೊಟ್ಟವ
ಚಿಂತೆಯೆಂಬ ಸಂತೆಯಲ್ಲಿ ಬೇರ ನೆಟ್ಟವ
ಆಕಾಶದ ತುತ್ತ ತುದಿಗೆ ಬೆರಳ ಅಂಚಲೇ
ಅಂಚೆ ಕಳಿಸಿದಂತೆ ನಿಟ್ಟುಸಿರು ಬಿಟ್ಟವ


ನಿದ್ದೆಯಲ್ಲಿ ಒರಗಿತೊಂದು ಕನಸು ಮೆಲ್ಲಗೆ
ಉಸಿರ ಸವರಿದಂತೆ ಮೆಲ್ಲ ಮೃಧು ಮಲ್ಲಿಗೆ
ಆಕಳಿಕೆಯ ಬೀಳ್ಗೊಡುಗೆಗೆ ಒಂದು ಜೋಗುಳ
ಹೊದ್ದಿಸೋಕೆ ಚಂದ್ರ ಕಳಿಸಿಕೊಟ್ಟ ತಿಂಗಳ...