Tuesday, 9 December 2014

ಬಂಡೆ ಹೂವು

ಬಂಡೆ ಬುಡದ ಹುಲ್ಲು
ನಾ ರಾಗಿ ಕಾಳಿನಷ್ಟೇ ಕಲ್ಲು
ಎತ್ತರಕ್ಕೆ ಆಕಾಶ
ಸುತ್ತಿ ಬರಲು ಭೂಮಿ
ತೀಡಿದರೆ ಕಾವ್ಯ ತೈಲ
ಬೇಡದೆಯೂ ದಕ್ಕಿ ನೆರಳು
ಹರಡಿಕೊಂಡ ಅದರ ಸುತ್ತ
ಕಾವ್ಯ ರಸಿಕ ಪಂಗಡ
ಬಿಸಿಲಿಗೊಂದು ಬೇಗೆ ಸಾಲು
ಮಳೆಗೊಂದು ಹನಿಗವನ
ಚಳಿಗಾಲಕೆ ಉದುರಿದಂತೆ
ಪಕ್ವ ಎಲೆಯ ಪದಗಳು
ಚಾಮರಕೆ ತೊನೆದು ತೊನೆದು
ಬಳುಕಾಡಿದ ಪಚ್ಚೆ ಕೊಂಬೆ
ಚಂದಿರನ ತಲೆಯ ಮೇಲೆ
ಹೊತ್ತಿಡಲು ಜೊನ್ನ ಸಿಂಬೆ
ಬಳ್ಳಿಯಾಗಿ ಹಬ್ಬಿ ಬೆಳೆದ
ದಾರಿಯುದ್ದಕೂ ತಾಳೆ ಗರಿಯ
ಕೆತ್ತಿ, ಕೊರೆದ ಕಾವ್ಯ ಘಮ
ಉನ್ಮಾದದ ಮನೋರಮ;
ವಸ್ತು, ವಸ್ತುವಿನಲೂ ಜೀವ-
ಭಾವ ಸಂಚಲನ-ವಲನ
ಪಠಿಸಿ ಸೋತ ನಾಲಗೆಗೆ
ಉತ್ಕೃಷ್ಟ ಲೇಪನ!!
ಬಂಡೆ ಅಂದವರೆಲ್ಲ
ಬುಡದಲ್ಲೇ ಊಳಿದವರು
ಬಲಿಯ ಬೇಕು ಬುದ್ಧಿ
ತಿಳಿಯಲಿಕ್ಕೆ ಮನಸು
ತಾ ನಿರ್ವಿಕಾರ ಪ್ರತಿಮೆ
ನವಿರು, ಒರಟು ಮಿಶ್ರಿತ
ಅಪ್ರತಿಮ ಶಿಲ್ಪ ಕಲೆ!!
ಗುಂಡಿಗೆ ಇದ್ದರೆ ಸಾಲದು
ಅದರೊಳಗೂ ಬೇಕು ಚೂರು
ಕಿಚ್ಚು, ಪ್ರೀತಿ, ಅಭಿರುಚಿ
ವ್ಯಂಗ್ಯ, ಹಾಸ್ಯ, ಅಭಿಮಾನ,
ಸಣ್ಣ ಮಗುವಿನ ನಿಲುವು;
ಆಗ
ಬಂಡೆ ಬಾಗಿ ಒಲಿವುದು
ಓದುಗ ಮನಸಿನ ಪಾಲಿಗೆ
ಮೃದು ಹೂವಿನಂತೆ!!
                    -- ರತ್ನಸುತ

No comments:

Post a Comment

ನೀರವ ಸ್ಥಿತಿಯಲ್ಲಿ ಯಾರಿವನೆನ್ನದಿರು

ನೀರವ ಸ್ಥಿತಿಯಲ್ಲಿ ಯಾರಿವನೆನ್ನದಿರು ನೀನಿರದೆ ಈ ಗತಿ ಸಿದ್ಧಿಸಿತು ಜೀವಕೆ ಹಾಡುಹಗಲಲ್ಲಿ ನೀ ಆವರಿಸಿಕೊಂಡಿರುವೆ ಕನಸೊಂದು ಬೀಳುತಿದೆ ಗೊತ್ತಿದ್ದೂ ಬಾವಿಗೆ ಬ...