Wednesday, 19 August 2015

ಮತ್ತೆ ಮತ್ತೆ ಅಂಕುರ

ಹೃದಯ ನೀಡುವೆ ನಿನಗೆ
ಪ್ರೀತಿ ಉಳಿಸಿಕೊಂಡು
ಪ್ರಾಣವಾದರೂ ಬಿಡುವೆ
ಉಸಿರ ಎಳೆದುಕೊಂಡು


ಮಾತಿಗೆಳೆಯುವೆ ನಿನ್ನ
ದೂರ ಉಳಿದುಕೊಂಡು
ಹದ್ದು ಮೀರುವೆ ಮತ್ತೆ
ಸೀಮೆ ಎಳೆದುಕೊಂಡು


ಹಾಡು ಹಾಡುವೆ ನಿನಗೆ
ಮೂಕ ರಾಗದಲ್ಲಿ
ಗೆಜ್ಜೆ ಕಟ್ಟಲು ಬರುವೆ
ನಿನ್ನ ಸ್ವಪ್ನದಲ್ಲಿ


ಖಾಲಿಯಾಗುವೆ ನಾನು
ನಿನ್ನ ತುಂಬಲೆಂದು
ನೀಲಿಯಾಗುವೆ ನಿನ್ನ
ಆಸೆ ಬಾನಿಗೆಂದು


ಅಲ್ಲೇ ನಿಲ್ಲುವೆ ನೀ
ನಿಲ್ಲು ಅಂದ ಕಡೆಯೇ
ನಿಲ್ಲದಂತೆಯೇ ಬರೆವೆ
ನಿನ್ನ ನೆನೆದು ಬರೆಯೆ


ಮನಸ ನೀಡಿ ಕೇಳು
ಇದುವೆ ನನ್ನ ಕೊನೆಯ ಸಾಲು
ಜೀವ ತಾಳುವೆ ನೀ
ಮತ್ತೆ ಓದಿಕೊಳಲು


                     -- ರತ್ನಸುತ

No comments:

Post a Comment

ನೀರವ ಸ್ಥಿತಿಯಲ್ಲಿ ಯಾರಿವನೆನ್ನದಿರು

ನೀರವ ಸ್ಥಿತಿಯಲ್ಲಿ ಯಾರಿವನೆನ್ನದಿರು ನೀನಿರದೆ ಈ ಗತಿ ಸಿದ್ಧಿಸಿತು ಜೀವಕೆ ಹಾಡುಹಗಲಲ್ಲಿ ನೀ ಆವರಿಸಿಕೊಂಡಿರುವೆ ಕನಸೊಂದು ಬೀಳುತಿದೆ ಗೊತ್ತಿದ್ದೂ ಬಾವಿಗೆ ಬ...