ಗುಳ್ಳೆ ಪಟಾಕಿ (2)

ಎತ್ತಿ ಎದೆಗಪ್ಪುತಿರುವಂತೆ
ಕಿಸೆಗೆ ಕೈ ಹಾಕಿದವ
ಬೇಡದ್ದ ಚಲ್ಲುತ್ತ
ಬೇಕಾದ್ದ ಗೆಲ್ಲುತ್ತ
ಕೆಳಗಿಳಿಸು ಎಂಬಂತೆ
ಇದ್ದಲ್ಲೇ ನುಲಿವಾತ
ಹೇ ಬಾಲಕೃಷ್ಣ ನೀ
ಹೆಜ್ಜೆಯನ್ನಿಡುತಿರೆ!!

ಹಠದಲ್ಲಿ ನಿಸ್ಸೀಮ
ದಿನಕೊಂದು ಹೊಸ ಚಟ,
ಒದ್ದೆ ಚಡ್ಡಿಯ ಕಳಚಿ
ನೆಲ ಸಾರಿಸುವ ನೀ
ನಿದ್ದೆಯಲಿ ಬುದ್ಧನು
ಎದ್ದು ಬಿಟ್ಟರೆ ಗಾಂಧಿ
ಹಾಲು ಹಲ್ಲಿಗೆ ಬೇಡುತೀ
ಕಚ್ಚು ಬೆರಳ!!

ನಿನ್ನ ಹೊಟ್ಟೆಗೆ 
ನಿನ್ನದೇ ತುಂಟ ತಕರಾರು
ಕಲ್ಲು, ಮಣ್ಣು, ಚುಕ್ಕಿ
ಚಂದ್ರ ಆಟಿಕೆ ನಿನಗೆ
ಮನೆ ಗೋಳು ಸಾಕಾಗಿ
ಹೊರ ನಡೆವ ವೈರಾಗಿ
ಹೆಜ್ಜೆ ಹೆಜ್ಜೆಗೂ ತೊಡಕು
ಬಿದ್ದೆ ಕಡೆಗೆ!!

ಅತ್ತು ಒಂದಾಗಿಸುವೆ
ಭೂಮಿ ಆಕಾಶವ,
ಬೀಳಿಸಿದವರಿಗೊಂದು
ಲಾತ ಕೊಡುವರೆಗೆ;
ಯಾರೆಷ್ಟೇ ಮುದ್ದಾಡಿ
ಏನ ಕೊಡಿಸಿದರೂ
ಅಮ್ಮಳ ಹುಡುಕುವೆ
ಎಲ್ಲದರ ಕೊನೆಗೆ!!

ಕಲಿವುದಿಷ್ಟಿದೆ ಕಂದ
ಎಂದು ತಿದ್ದುವ ಮುನ್ನ
ಪ್ರತಿ ಗಳಿಗೆ ಹೊಸ ಕಲಿಕೆ
ಬಲು ಚತುರ ನೀನು;
ಅಪ್ಪ, ಅಮ್ಮ, ಅಜ್ಜಿ, ತಾತ,
ಮಾವ, ಅತ್ತೆ
ದೊಡ್ಡಪ್ಪ-ಅಮ್ಮ, ಚಿಕ್ಕಪ್ಪ-
ಅಮ್ಮಂದಿರು
ನೆನಪಿಡುವುದು ಬಲು ಕಷ್ಟ ಕಾಣೋ!!

ಅಂಗಾಲು ದೃಢವಾಗಿ
ಮೊಣಕಾಲು ಬಲಿತಂತೆ
ಎಲ್ಲೆಲ್ಲೂ ನಿನ್ನದೇ
ತೀಟೆ ಗುರುತು;
ಎಲ್ಲಿಯೂ ನಿಲ್ಲದ,
ಮನೆಯನ್ನೂ ಬೇಡದ 
ಪುಟ್ಟಪ್ಪ ತಾತನ ಬಯಕೆಯಂತೆ 
ನೀ ವಿಶ್ವ ಮಾನವನೇ?!!

                           -- ರತ್ನಸುತ

Comments

Popular posts from this blog

ಜೋಡಿ ಪದ

"ಪಾಸ್ವರ್ಡ್" - RESET ಆಗ್ತಿರ್ಲಿ ಆಗಾಗ!!!

ಗರುಡ ಪ್ರಯತ್ನ ೩