Friday, 4 April 2014

ಮಿಣುಕು

ಮೂಗುತ್ತಿ ಕಳಕೊಂಡು
ಕಿಂಚಿಷ್ಟೂ ಚಿಂತಿಲ್ಲ
ಯಾವ ದೆವ್ವ ಮೆಟ್ಟಿಕೊಂತು
ಬಿನ್ನ ನಡತೆಗೆ
ಮೂರ್ಹೊತ್ತೂ ಸಳೆಕೊಂಡು
ಬೆನ್ನ ಹಿಂದೆ ಬೀಳುತೀಯೆ
ಸಬೂಬು ಏನ ನೀಡಬೇಕು
ದೇಹ ಜಡತೆಗೆ

ಕೆಂಪೆದ್ದ ನಾಲಗೆಯಲಿ
ನನ್ನ ಕೋಪ ಬಿಂಬಿಸುತ್ತ
ಮತ್ತೂ ಸುಣ್ಣಗಾಯಿ ತೀಡಿ
ಸುಟ್ಟುಕೊಳ್ಳುವೆ
ಇರಲಿಯೆಂದು ಚೂರು-ಪಾರು
ಘದರು ಗಾಂಭೀರ್ಯದಲಿ
ಅಂಗಿ ಕೊನೆಗೆ ನಿನ್ನ ಸೆರಗ
ಕಟ್ಟಿಕೊಳ್ಳುವೆ

ಮೊನ್ನೆ ತಂದ ಕೆಂಗುಲಾಬಿ
ಹಾಳೆ ನಡುವೆ ವ್ಯರ್ಥವಾಗಿ
ಮರು ಹುಟ್ಟಿನ ಹಕ್ಕಿನಲ್ಲೇ
ಸಿಟ್ಟು ಬೀರಿದೆ
ಸಂತೆಯಲ್ಲಿ ಕೊಡಿಸದಂಥ
ಮಣಿಯ ಸರಕೆ ಮುನಿಸಿಕೊಂಡೆ
ಹಠವ ಜೊತೆಗೆ ಹೊತ್ತು ತಂದೆ
ಬಿಟ್ಟು ಬಾರದೆ

ಘಾಟು ನುಡಿಯ ಕೊಂಕಿನಲ್ಲಿ
ದಾಟಿ ಬರುವೆ ಎಲ್ಲ ವಾದ
ಸೋತ ದಿನದಿ ಮಾತ್ರ ನೀನು
ಸತ್ಯ ಸುಂದರಿ
ಹೇಳಿ ತೀರದಂಥ ಮಾತು
ಪಳಗಿತಲ್ಲ ಸೋತು-ಸೋತು
ಹೊಗಳಿಬಿಟ್ಟರಲ್ಲಿ ಮುಗಿಯದಲ್ಲ
ವೈಖರಿ

ಮೂಗುತ್ತಿ ಹುಡುಕಾಟಕೆ
ನನ್ನ ಸಂಗ ಕರೆದು ನೋಡು
ಸಿಗದ ಅದಕೆ ಹೊಸತು ರೂಪ
ಮತ್ತೆ ನೀಡುವೆ
ಕಳ್ಳತನದ ಅರಿವಿನಲ್ಲೂ 
ಅರಿಯದಂತೆ ನಟಿಸುತೀಯೆ
ಮೌನ ವಹಿಸಿದಾಗ ಮುಷ್ಠಿ
ಬಿಡಿಸಿಕೊಳ್ಳುವೆ

                         --ರತ್ನಸುತ

1 comment:

  1. ಯಾವುದೋ ಪುಳಕಕ್ಕೆ ಮನಸ್ಸು ಈಡಾಯಿತು. ಅ ಮಿಣುಕು ಚಿತ್ರಗಳು ಸಾದೃಶವಾದವು.

    ReplyDelete

ನೀರವ ಸ್ಥಿತಿಯಲ್ಲಿ ಯಾರಿವನೆನ್ನದಿರು

ನೀರವ ಸ್ಥಿತಿಯಲ್ಲಿ ಯಾರಿವನೆನ್ನದಿರು ನೀನಿರದೆ ಈ ಗತಿ ಸಿದ್ಧಿಸಿತು ಜೀವಕೆ ಹಾಡುಹಗಲಲ್ಲಿ ನೀ ಆವರಿಸಿಕೊಂಡಿರುವೆ ಕನಸೊಂದು ಬೀಳುತಿದೆ ಗೊತ್ತಿದ್ದೂ ಬಾವಿಗೆ ಬ...