Wednesday 2 April 2014

ನಾನು, "ನಾನು"

ನಿನ್ನ ಮರೆತದ್ದು ನಾನಲ್ಲ 
ನನ್ನೊಳಗ "ನಾನು";
ನಾನೆಷ್ಟೇ ಬೇಡಿಕೊಂಡರೂ
ತನ್ನಂತೆ ತಾನು!!

"ನಾನು" ನನ್ನನ್ನ ಎಂದೂ
ನಂಬಿದವನಲ್ಲ;
ನಾ ನಂಬದೆ
ಬೇರೆ ದಾರಿಯಿರಲಿಲ್ಲ!!

ನಾನೊಲ್ಲದ ನನ್ನೊಡನೆ
ಏಕಿರಬೇಕು?
ಯಾರೋ ಸಾಕಿರಬೇಕು
ಒಂದೇ ತೊಟ್ಟಿಲ ತೂಗಿ?

ನಾನಿರುವಂತೆ ಇರಿಸದೆ
ಇರಿದಿರಿದು ಕಾಡುವುದು
ಇರುವಿಗೋ?
ಅರಿವಿಗೋ?
ಹರಿವಿಗೋ?!!

ನಾನಾಗಿ ನನ್ನನ್ನ
ದೂರುವುದು 
ನನ್ನತನಕ್ಕೂ ಪೆಟ್ಟು
ನನಗೂ ಸಹಿತ!!

ನನಗೇ ಗೊತ್ತಿಲ್ಲದಂತೆ
ಗುಟ್ಟಾಗಿ ಬರೆದೆ;
"ನಾನು" ಸಿಕ್ಕರೀಕುರಿತು
ಕೇಳಬೇಡಿ!!

ನಾ ಬರುವ ಹೊತ್ತಾಯ್ತು
ನನ್ನ ತಡೆಯಲು ಬೇಡ 
"ನನ್ನ" ತಪ್ಪಿಗೆ
ನನ್ನ ಗುರಿ ಮಾಡಬೇಡ!!

                   --ರತ್ನಸುತ 

1 comment:

  1. ಅಹಂ ಹಂಗಿಗೆ ಸಿಕ್ಕು ಕಳೆದುಕೊಳ್ಳುತ್ತೇವೆ ಸಖ್ಯ ಸುಖಃವ!

    ReplyDelete

ಅತಿ ಮಧುರ ಅನುರಾಗ

ಅತಿ ಮಧುರ ಅನುರಾಗ  ನಿನ್ನೊಲವ ಮಳೆ ಹನಿಗೆ  ಮಿಂದಿರಲು ಮನಸಿದು     ನಿಂತು ನಿಂತು ಬೀಸಿದಂತೆ  ಸಂಜೆ ತಂಪು ಗಾಳಿ  ಅಂಕೆ ಮೀರಿ ಬರುವ ಮಾತು  ಹಾಕಬೇಕೇ ಬೇಲಿ  ಜೊತೆ ಇರಲು ...