ಕರೆವೆ ಮತ್ತೆ ಮತ್ತೆ ಇದೋ

ಕರೆವೆ ಮತ್ತೆ ಮತ್ತೆ ಇದೋ

ಮನಸಿನೊಳಗೆ 

ನಿನಗೆಲ್ಲ ತಿಳಿವಂತೆ

ಅರಿವೆ ಏನಂದುಕೊಂಡರೂ

ನಿನ್ನೊಳಗಿರುವ 

ನಾನೆಲ್ಲ ಕಲಿತಂತೆ

ಬರುವೆ ಮುಂಚಿತವಾಗಿ

ಎದುರುನೋಡುತ ಕೂತು

ನಿನಗಾಗಿ, ನಿನಗಾಗಿ

ನೂರಾರು ಕಾಲಕ್ಕೂ

ಹೀಗೇನೇ ಒಂದಾಗಿ

ಬಳೋಣ ನಾವಿನ್ನೂ

ಹಾಯಾಗಿ.. ಹಾಯಾಗಿ

ಈ ಪ್ರೇಮ ಯಾನಕ್ಕೆ

ಸುತ್ತೋಲೆ ನೀಡುತ್ತ

ಸುತ್ತಾಡಿಕೊಳ್ಳೋಣ

ಹಾಯಾಗಿ.. ಹಾಯಾಗಿ

ಒಂದು ಎಲೆಯು ಉದುರೋದು

ಮತ್ತೆ ಚಿಗುರಿ ಅರಳೋಕೆ

ಕಳೆದುಕೊಂಡುದ ನೆನೆದು

ಇರುವ ಕ್ಷಣವ ಕಳಿಬೇಕೆ?

ನೆನಪ ಸಂತೆಯ ತುಂಬ

ನಮ್ಮ ಹೆಜ್ಜೆಯ ಗುರುತು

ಹುಡುಕೋಣ.. ಹುಡುಕೋಣ..

ಒಂದೂರಿನಲ್ಲೊಬ್ಬ

ಚೆಲುವಾಂತ ಮಾರಾಯ

ಯುವರಾಣಿ ಹುಡುಕುತ್ತ

ಬಂದಂತೆ.. ಬಂದಂತೆ..

ಆ ರಾಣಿ ಯಾರೆಂದು

ಕಣ್ಣಾರೆ ಕಂಡಾಗ

ದಂಗಾಗಿ ನಿಲ್ಲುತ್ತ

ಸೋತಂತೆ.. ಸೋತಂತೆ..

ನಿದಾನಿಸು ನಿದಾನಿಸು ನೀ

ನಿದಾನಿಸು 

ನಿದಾನಿಸು ನೀ 

ನಿದಾನಿಸು 

ನಿದಾನಿಸು ನೀ 

ನಿನ್ನ ಹಿಂಬಾಲಿಸಿ

ಬಂದೆ ನಾ

ಬಚ್ಚಿಡುವೆ ನೆರಳ

ಕಾಣದೆ

ನಿನಗೆ ನಾ ಸಿಗುವೆ

ನಿದಾನಿಸು ನೀ

ಎಲ್ಲೋ ಕಳೆದ ಸಾಲನ್ನು ಹುಡುಕಲೇ?

ನಾನೇ ಮರೆತ ಹಾಡೊಂದ ಹಾಡಲೇ?

ಒಂಟಿ ನಾನು ಆಗೋದು 

ನಿನ್ನ ನೆನಪೇ ಇರದಾಗ

ಎಲ್ಲ ಸಮಯ ನೀ ಜೊತೆಯಾದೆ

ನೆನಪಿಗೆ..

ಆಗುವೆ ರೂಪಾಂತರ ನಾ ದಿನ

ಗುರುತು ಸಿಗದೇ ಹೋಗೋಕೆ ಕಾರಣ

ಕಣ್ಣಿನೆದುರು ಬಂದಾಗ

ಕಣ್ಣಲೇ ಒಂದಾದಾಗ

ಜಾರಿ ಬಂದ ಕಂಬನಿ ಸಾಕ್ಷಿ

ನೆನಪಿಗೆ..

ಚಂದ್ರ ಬಂದ ನಿನಗಾಗಿ

ಚಂದ್ರ ಬಂದ ನಿನಗಾಗಿ

ಬೆಳದಿಂಗಳೊಳಗೊಂಡು

ಬಿಳುಪಾದ ಬೆಳಕನ್ನು ಎದೆಗಾನಿಸಿ

ಇದೋ ಕಂದ ಜೊತೆಗಾರ

ಇರುತಾನೆ ಸದಾ ಕಾಲ

ಇರುಳಾಗೆ ಭಯ ಬೇಡ ಕವಿಯೇ ಮಸಿ

ಒಂಟಿ ಮನೆಯ ಒಂಟಿ ದೀಪ ಊರಿಗೆಲ್ಲವೂ

ಜಾರಿಕೋ.. ನಿದ್ದೆಗೆ..

ಕಣ್ಣ ಕಡಲಾಗೆ ನೂರಾರು ಬಣ್ಣ

ಬೆರೆತಂತೆ ಕನಸಿನ್ನೂ ಚನ್ನ

ನೀ ಮಲಗೋಕೂ ಮುನ್ನ

ಬಿಗಿದಪ್ಪು ನನ್ನ

ಅತ್ತ ಇತ್ತ ನೋಡುತ್ತ

ಮರುಳಾಗ ಬೆಡಯ್ಯ

ನಿನ್ನ ಕೈಯ್ಯ ಹಿಡಿದಾನು

ಆ ಗುಮ್ಮಯ್ಯ

ಅಮ್ಮ..

ನಿನ್ನಲ್ಲಿ ನನ್ನನ್ನ

ನನ್ನಲ್ಲಿ ನಿನ್ನನ್ನ

ಹೇಗೆ ಬಚ್ಚಿ ಇಟ್ಟುಕೊಂಡೆ ಹೇಳು

ಏನೋ ಒಂದು

ನೆಪ ಹೇಳಿ

ವಿಷಯಾಂತರ ಮಾಡೋ ಕಲೆ.. ಓ..

ಇಲ್ಲಿ ಕೇಳು

ನನ್ನ ಬಾಳು

ನಿನಗಾಗೇ ಮೀಸಲು ಈಗಲೇ.. ಓ..

ತಾರೆ ತಾರೆ ಸಾಲಾಗಿ

ನಿಲುತಾವೆ ಸೊಗಸಾಗಿ

ನಿನ್ನ ರೂಪ ಬಿಡಿಸೋಕೆ ಆಕಾಶದಿ

ಬಾರೋ ಬೇಗ ಹಸಿದಲ್ಲಿ

ದಣಿದಲ್ಲಿ ಕರುವಾಗಿ

ಬಸಿದಂತ ಬೆವರಲ್ಲೇ ಹಾಲುಣಿಸುವೆ

ಅಂಟಿದಂಥ ಪಸೆಯನ್ನು ನೇವರಿಸುವೆ

ಕಂದ ಜೋ.. ಜೋ ಲಾಲಿ...

ತೀರದ ಮೋಹ ನಿನ್ನ ಕಂಡು

ತೀರದ ಮೋಹ ನಿನ್ನ ಕಂಡು

ಹೇ.. ಯಾಕೆ

ಸಖಿ, ತಿಳಿ

ನಾ ನಿನ್ನ ಬೇಡಿ

ಸಾಕಾಗಿ 

ಹೀಗಾದೆ

ಮರುಭೂಮಿ ಬರಡಾದೆ

ನಿನ್ನ ಜೊತೆ, ನನ್ನ ಕತೆ

ಶುರುವಾಗಿ ಕೆಲ ಕಾಲ

ಆದಂತೆಯೇ ಮುಗಿವಂತಿದೆ

ಬೇಡ ಇನ್ನು

ಆತುರ ಏತಕೆ

ನನ್ನ ಸಂಕೋಲೆ ನೀ ಮುರಿದು ಹೋದೆ

ಹಾಕುಲೇ ಪೀಠಿಕೆ

ಕೈಯ್ಯ ಹಿಡಿಯುತ್ತ ಮುನ್ನಡೆಸಲು

ಜೀವವೇ.. ಜೀವವೇ...

ಕಮಲಾಂಕಿತ ನಯ ನಾರಿ

ಕಮಲಾಂಕಿತ ನಯ ನಾರಿ 

ಹೂ ಬಾಣ ಹೂಡೋ ಪ್ರಹಾರಿ 

ಮೃದು ಮಲ್ಲೆಯನೂ ಮೀರಿ

ನುಡಿದಾಗ ಹೊಮ್ಮೋ ಶಾಯರಿ 

ಬೇಕೆಂದರೂ ಬಾರದಪಸ್ವರ 

ಸಾಕೆಂದರೂ ಸುರಿವ ಧಾರೆ 

ಆ ಕೋಮಲ ಬೆರಳಾಕೃತಿ

ಕೊಳಲನ್ನೂ ಮೀರಿಸುವ ಸೂರೆ

ಸರಿದೂಗಿ ಕೊಡುವಾಸೆ

ಸರಿದೂಗಿ ಕೊಡುವಾಸೆ 

ಹೃದಯ ನಿನದಾಗಿದೆ 

ನಿನ ಮೇಲೆ ಅತಿಯಾದ 

ಒಲವು ಶುರುವಾಗಿದೆ 

ಅಂತರವೆಲ್ಲ ನಂತರವಿರಲಿ 

ಆದರೆ ಬೇಗ ಒಪ್ಪಿಗೆ ಸಿಗಲಿ 

ನಿನಗೂ, ನನಗೂ ಹೊಂದುವ ಹಾಗೆ 

ಸರಳ ದಾರಿ ಹುಡುಕೋಣ 

ಕೊನೆಯ ವರೆಗೂ ಹೆಜ್ಜೆ ಇರಿಸು 

ಜೊತೆಯ ಸವಿದು ಸುಖಿಸೋಣ 

ಹೇಳಿ ಕೇಳಿ ಮಾಡೋದಲ್ಲ (೨)

ತಾನಾಗೆ ಪ್ರೀತಿ ಮೂಡೋ ಮಾಯೆ..

ಒಲಿದೆ ನೀನು ಕ್ಷಿತಿಜದ ಹಾಗೆ

ನಿನ್ನ ತಲುಪೋ ರೆಕ್ಕೆ ನೀಡು

ನನ್ನ ನೆರಳೇ ನನ್ನನು ತಡೆದು

ನಿನ್ನ ಕಡೆಗೆ ದೂಡಿತು ನೋಡು

ನಿಂತು ಕಣ್ಣಾರೆ ನೋಡೋ ಆಸೆ (೨)

ನೋಡಿ ನೋಡದ ಹಾಗೆ ನಟಿಸು..

ನೀನು ಬಂದೆ ಸನಿಹ ಹೀಗಾದೆ

ನೀನು ಬಂದೆ ಸನಿಹ ಹೀಗಾದೆ 

ನಿನ್ನ ಮೇಲೇ ಗಮನ 

ನೀನೇ ನನ್ನ ಮನದ ಇರಾದೆ 

ನೀನೇ ನನ್ನ ಕವನ 

ಯಾರೇನೇ ಅಂದರೂ

ನಿನ್ನಲ್ಲೇ ಇರುವೆ ನಾ

ಪ್ರೇತಿಗೆ ಮೀಸಲು

ಈ ನನ್ನ ಜೀವನ

ಓ... ಓ...

ಕೆಂಬಣ್ಣದ ಸಂಜೆಗೆ

ನೀನಾದೆಯಾ ಕಾರಣ?

ಮುಂಗೋಪವ ಬೀರುವೆ

ಎದೆಯಲ್ಲಿ ಭೂ ಕಂಪನ

ಮುಂಗಾರಿನ ಆಗಮನಕೆ

ಬಿರಿದ ನೆಲ ಸಜ್ಜಾಗಿದೆ....

ಓ... ಓ...

ಆರಂಭವೇ ರೋಚಕ

ಈ ಪಯಣವಿನ್ನೂ ಸವಿ

ಒಲವಾಗುವ ಮೂಲಕ

ನಾನಾದೆನಾ ಹುಸಿ ಕವಿ

ಬೆರಳಂಚಿನ ಗೋರಂಟಿಯ

ನನ್ನೆದೆಗೆ ನೀ ಗೀಟಾಗಿಸು...

ಓ... ಓ...

ನಿನ್ನೊಂದಿಗೆ, ಎಲ್ಲಿದ್ದರೂ

ನಿನ್ನೊಂದಿಗೆ, ಎಲ್ಲಿದ್ದರೂ 

ಮಾತು ಕತೆ, ಸಾಗಿದೆ 

ಗುಟ್ಟುಗಳ, ಬೇಕಂತಲೇ 

ಕಾಪಾಡುವೆ, ಹೇಳದೆ 

ಏಕೋ ಈಗ 

ಕಣ್ಣು ತುಂಬಿದಂತೆ 

ಬೇಡೆಂದರೂ 

ನಿಲ್ಲದೆಯೇ 

ಜಾರಿದೆ ಮತ್ತೆ.. ಕಣ್..

ಒಂಟಿತನವೇ ಜೊತೆಯು ಈಗ

ಬೇರೆ ಯಾವ ನಂಟಿಲ್ಲ

ನಿನ್ನ ನೆರಳು ಕಂಡೂ ಕೂಡ

ನನಗೆ ನಂಬಿಕೆ ಬರುತಿಲ್ಲ

ಎಂದೋ ಮರೆತ ಊರು ಇನ್ನೂ

ದೂರದಲ್ಲೇ ಉಳಿದಂತೆ

ನನ್ನ ಗುರುತು ನನಗೇ ಇಲ್ಲ

ನಿನ್ನಲ್ಲಿ ಹುಡುಕಲು ತರವಲ್ಲ

ಮನದಾಳದ, ಕುಸಿದ ಸ್ವರ

ತುಟಿಯಂಚಿಗೆ, ಬಂದಿದೆ

ನಿನ್ನೆದುರು, ಹಾಡದಿರೋ

ಹಾಡುಗಳೇ, ಕಾಡಿದೆ

ಏಕೋ ಈಗ 

ಕಣ್ಣು ತುಂಬಿದಂತೆ 

ಬೇಡೆಂದರೂ 

ನಿಲ್ಲದೆಯೇ 

ಜಾರಿದೆ ಮತ್ತೆ.. ಕಣ್..

ನಿನ್ನ ಜೊತೆಯಲ್ಲೇ ಈ ಜೀವನ

ನಿನ್ನ ಜೊತೆಯಲ್ಲೇ ಈ ಜೀವನ 

ಖುಷಿಗಳೆಲ್ಲಕ್ಕೂ ನೀ ಕಾರಣ 

ಒಂದುಗೂಡಿ ಹಿತವಾಗಿದೆ 

ಎಂಥ ಚಂದ ನಮ್ಮೀ ಬಂಧನ 

ನಾ ಬರುವೆನು ನಿನ್ನ ಬೆನ್ನ ಹಿಂದೆ 

ಅದಾವುದೇ ದಾರಿಯ ನೀ ಹಿಡಿ 

ಒಲವಿನ ಸಾಲು ಗೀಚಿ ಕಳಿಸು 

ಅದಾಗಲಿ ಬಾಳ ಮುನ್ನುಡಿ 

ನರನಾಡಿಯಲ್ಲೂ ಸಂಭ್ರಮ ನೀ 

ಹಿಡಿವಾಗ ನನ್ನ ಕಯ್ಯನು 

ಏನೆಂದು ಹೇಳೋ ಮುನ್ನವೇ ನಾ 

ಏನೆಂಬುದೆಲ್ಲ ಬಲ್ಲೆನು 

ಈ ಗರಿಗೆದರಿಸುತ ಆಕಾಶಕೆ 

ನಾ ಹಾರಿದೆ ಯಾವ ಭಯವಿಲ್ಲದೆ 

ಸಮಯದ 

ಸಂಗಾತಿ, ಸಂಗಾತಿ

ಸಂಗಾತಿ, ಸಂಗಾತಿ

ಬಾ ಹೇಳುವೆ ಒಂದು ಸಂಗತಿ

ಈ ಬಾಳ ಯಾನದಲಿ

ಆಗುವೆಯಾ ನನ್ನ ಸಾರಥಿ

ಮುಂದಾಗಿ ಹೋಗಬೇಡ ನಿಲ್ಲು ಚೂರು

ಬಂದೆ ಈಗಲೇ

ಕಲ್ಲಾಗಿ ನಿಂತೆ ನೋಡು ನೀನು ಒಮ್ಮೆ 

ಸೋಕಿದಾಗಲೇ

ಕರೆದಲ್ಲಿ ನಾನು ಬರುವೆ ಸದಾ

ನಗುವಲ್ಲಿ ನಾನು ಸಿಗುವೆ ಸದಾ

ಜಗವನ್ನೇ ಗೆಲ್ಲಬಲ್ಲೆ ಹೇಳು ಜಯಿಸೋದಾ..

ಓ.. ಹೇಗಾದರೂ ಹೊಂಗನಸನು

ನೀ ಕದ್ದು ಹೋಗೆಯಾ

ಮುನ್ನೆಚ್ಚರ ಇರುವಂತೆಯೇ

ನೀ ಎಡವಿ ಬಿದ್ದೆಯಾ

ನನ್ನ ಕತೆ ನಿನ್ನ ಜೊತೆ

ಗೀಚೋದೇ ಸುಂದರ

ಈ ನಾಳೆಯ ಚಪ್ಪಾಳೆಗೆ

ನೀ ಹಾಳೆಯಾದೆಯಾ

ಹೇಗೋ ಮನ ದಿನ ಹೊಸ ಹೊಸ

ವಿಚಾರ ಮಾಡುತ

ನಿನ್ನ ಜಪ ತಪನೇ ಜೀವಮಾನಕೆಂದು ಶಾಸ್ವತ.

ಕರೆದಲ್ಲಿ ನಾನು ಬರುವೆ ಸದಾ

ನಗುವಲ್ಲಿ ನಾನು ಸಿಗುವೆ ಸದಾ

ಜಗವನ್ನೇ ಗೆಲ್ಲಬಲ್ಲೆ ಹೇಳು ಜಯಿಸೋದಾ..

ಅರಿಯದ ಸಂಭ್ರಮ

ಅರಿಯದ ಸಂಭ್ರಮ

ನಿನ್ನ ಜೊತೆ ಇದ್ದರೆ

ಖುಷಿಗಳ ಸಂಗಮ

ನೀನು ನಗುತಿದ್ದರೆ

ನನ್ನ ದಾರಿ, ನಿನ್ನ ದಾರಿ ಒಂದೇ ಇನ್ನೂ

ಬಿಟ್ಟು ದೂರ ಆಗಲಾರೆ ಎಂದೂ ನಾನು

ಜೀವ ನಿನ್ನದಾದಮೇಲೆ ಬೇರೆ ಏನು

ಕಣ್ಣಿನಲ್ಲಿ ಪ್ರೀತಿ ಉಕ್ಕ ಬಾರದೇನು?

ಕರುಣಿಸು ಒಂದು ವರ.. ಒಪ್ಪಿಸುವೆ

ಪ್ರಣಯದ ಕವಿತೆಯ

ಭಯವನು ಪಡದಿರು.. ಹೊತ್ತಿಸುವೆ

ಒಲವಿನ ಹಣತೆಯ

ಇನ್ನೂ ಮುಂದೆ ಧ್ಯಾನವೆಲ್ಲ ನಿನ್ನದೇನೇ

ಎಲ್ಲ ನಿಜವನ್ನೂ ಮೀರೋ ಸ್ವಪ್ನ ನೀನೇ

ನೋಡು ಎಂಥ ಈಡು-ಜೋಡು ನಾವಿಬ್ಬರೂ

ಒಂದುಗೂಡಲೆಂದ ನೋಡು ದೇವರೇನೇ..

ನನ್ನ ದಾರಿ, ನಿನ್ನ ದಾರಿ ಒಂದೇ ಇನ್ನೂ

ಬಿಟ್ಟು ದೂರ ಆಗಲಾರೆ ಎಂದೂ ನಾನು

ಜೀವ ನಿನ್ನದಾದಮೇಲೆ ಬೇರೆ ಏನು

ಕಣ್ಣಿನಲ್ಲಿ ಪ್ರೀತಿ ಉಕ್ಕ ಬಾರದೇನು?

ಹೂವಿಗೆ ಜೇನ್ನೊಣಗಳ ಕಾಟ

ಹೂವಿಗೆ ಜೇನ್ನೊಣಗಳ ಕಾಟ 

ಹೂವಿಗೂ ಆ ಕಾಟವೇ ಇಷ್ಟ 

ಬಣ್ಣಗಳ ಬೆರೆಸುವ ಆಟ 

ಪ್ರಕೃತಿಯು ಕಲಿಸಿದ ಪಾಠ 

ಅನುರಾಗ ಶುರುವಾಗಿ

ಅನುರಾಗ ಶುರುವಾಗಿ 

ಜಗವೇ ಬದಲಾಗಿದೆ 

ಜೊತೆಗಾಗಿ ನೆರಳೀಗ 

ಬೆಳಕ ಹುಡುಕಾಡಿದೆ 

ಹಂಬಲದಲ್ಲಿ ಪ್ರೀತಿಸುವಾಗ

ಅಂಗಳವೆಲ್ಲ ಹಬ್ಬವೇ ತಾನೇ

ಮರದ ಹೃದಯ ಬಡಿದ ವೇಳೆ 

ಇರುವ ಹೃದಯಕ್ಕೆ ಕಲಸ ಇಲ್ಲ 

ಕರೆವ ಹೆಸರೇ ಹಾಡಾಗಿರಲು

ಬೇರೆ ಹಾಡೇ ಹಿಡಿಸೋದಿಲ್ಲ

ನಂಟು ಹಾಕೋ ನೂರು ಗಂಟು

ಎಂದೂ ಬಿಡಿಸೋಕೆ ಆಗೋದಿಲ್ಲ..

ಎದುರು ಬದುರು ಕೂತಾಗೆಲ್ಲ

ಕಣ್ಣು ಕಣ್ಣನ್ನೇ ನೋಡೋದೇಕೆ?

ಒಂದೋ ಎರಡೋ ಮಾತಾಡೋಣ

ಬಾಕಿ ಸಮಯ ಕಿರು ಸರಸಕ್ಕೆ

ಚಂದ ಚಂದ ತಂದ ಈ ಬಗೆ

ಪ್ರೀತಿ ಹೊರತು ಬೇರೆಲ್ಲಿಲ್ಲ..

ಹುಣ್ಣಿಮೆಯ ಸೊಬೆಗೆ

ಹುಣ್ಣಿಮೆಯ ಸೊಬೆಗೆ 

ನೀ ಧಾರೆಯಾಗಿ ಸುರಿದೆ

ಬೆರಗಾಗಿ ನಾನು ಉಳಿದೆ 

ಕಂಡು ಕೇಳರಿಯದಂಥ ಅಂದವೇ 

ನೀ ಬಳಿಯಲಿರಲು ಆನಂದವೇ 

ನೀನದೇ ನಿನದೇ ಸಕಲ 

ನನ್ನೇ ಬರೆದು ಕೋಡಲಾ?

ಮೊದಲ ಸಿಡಿಲು ಬಡಿದ ಭುವಿಯು

ಮಳೆಗೆ ಕಾದ ಹಾಗೆ ನಾನು

ಮರಳಿ ನಿನ್ನ ಮೊಗವ ಕಂಡು

ಮೊದಲಿಂತೆ ಅರಳಲೇನು?

ಗರಿಗೆದರಿದ ಅನುಭವ

ಉಸಿರುಸಿರಲೂ ಆಗಿದೆ

ಹದಿಹರೆಯದ ಕಲರವ

ಕನಸಿಗೂ ಖುಷಿ ತೋರಿದೆ

ಸರಿದ ಪರದೆಯನು, ಸರಿಸಿ ಹರಿದು ಬಿಡು

ಕವಿದ ಪ್ರೀತಿಯಲಿ ಸುಖಿಸು

ನೆಲವ ಕೊರೆಯುವುದ, ನಿಲಿಸಿ ಬೆರಳುಗಳ

ಎದೆಯ ಮೇಲಿರಿಸಿ ರಮಿಸು

ಬದುಕೋಣ ಪ್ರೀತಿಗಾಗಿ...

ಹಿಡಿಯ ನೆನಪ ಜೊತೆಗೆ

ಬಳಪ ಹಿಡಿಸು ನನಗೆ

ತವಕಗಳಿಗೆ ಬಿರಿದ ಪದವು

ಕರಗೋ ಮೊದಲೇ ಬರೆದು ಬಿಡುವೆ

ನಡುವೆ ಖಾಲಿ ಸ್ಥಳವ ಬಿಡುತ

ಗೀಚಿಕೊಳಲು ಅನುವು ಕೊಡುವೆ

ಉಲಿಯದ ಸರಿಗಮಗಳ

ಬೆರೆಸುತ ಹಾಡೋಣವೇ?

ನಾಳೆಯ ಹೊಸ ಪುಟಗಳ

ಈಗಲೇ ರಚಿಸೋಣವೇ?

ಹಸಿದ ಮನಸಿನಲಿ, ಕುಸಿದ ಬಯಕೆಯಿದೆ

ಬಿಸಿಯ ಪಾಯಸವ ಉಣಿಸು

ಸಿಗುವೆ ಬಿಡುವಿನಲಿ, ಮಗುವೇ ಆಗುತಲಿ

ನನಗೂ ಕುಣಿಯುವುದ ಕಲಿಸು

ಬೆರೆಯೋಣ ಪ್ರೀತಿಗಾಗಿ...

ಹೇಳದ ಮಾತು ನೂರಿವೆ

ಹೇಳದ ಮಾತು ನೂರಿವೆ 

ನಿನ್ನ ಮುಂದೆ ಮೌನ ತಾಳಿವೆ

ಮೀರಿ ಹೋಗಬೇಡ ಕಣ್ಣ 

ಗಾಯ ಮಾಡಬೇಡ 

ಗೇಲಿ ಮಾಡಬೇಡ ಹೀಗೆ 

ದಾಳಿ ಮಾಡಬೇಡ 

ನೀಲಿ ಬಾನಿನಾಚೆ ಸಾಗಿ

ತೇಲಿಹೋಗ ಬೇಡ

ಉತ್ತರ ನೀಡಬಲ್ಲೆಯಾ

ನಿನ್ನ ಮುಂದೆ ಮೌನ ತಾಳುವೆ

ಓಡಿ ಬಂದೆ ಹಿಂದೆ

ರೂಢಿಯಾದ ಹಾಗೆ

ಕೇಳಬೇಕು ನೀನೇ ನನ್ನ ಪಾಡು

ನೀನು ಅತ್ತ ವೇಳೆ

ನಾನು ಸತ್ತ ಹಾಗೆ

ಆಗ ಒಮ್ಮೆ ತಟ್ಟಿ ಪ್ರಾಣ ನೀಡು

ಈಗೀಗ ಎಲ್ಲ ನಿನ್ನದೇ

ನಿನ್ನ ವಿನಹ ಶೂನ್ಯಾವರಿಸಿದೆ...

ಹುಣ್ಣಿಮೆ ನಿನ್ನ ಪ್ರತಿರೂಪ

ಹುಣ್ಣಿಮೆ ನಿನ್ನ ಪ್ರತಿರೂಪ 

ಕಣ್ಣಲೇ ಹೊತ್ತು ಕಿರು ದೀಪ 

ಚಂದಿರ ನಿನ್ನ ಗುಣಗಾನ 

ಮಾಡುವ ದಿನ ಬರೋ ಮುನ್ನ 

ನಾನಿದ ಹೇಳಬೇಕು 

ಬಾಳಿಗೆ ನೀನೇ ಸಾಕು 

ಸಾಕ್ಷಿ ನಮ್ಮ ಪ್ರೀತಿಯೇ…

ಸಾಗುವುದು ಹೇಗೆ ಚೆಲುವ

ದಾರಿ ಒಂಟಿ ಈಗಲೂ 

ಹೆಜ್ಜೆಗೆ ಹೆಜ್ಜೆ ನಿನದು 

ಇರಲಿ ಜೊತೆಗೆ ಮೀಸಲು 

ಮೋಡವ ಹೊತ್ತು ತರುವೆ 

ನಿನ್ನ ಉಸಿರು ಸೋಕಲು 

ಮೀಯುವ ಇಬ್ಬರೂ ಅಲ್ಲಿ 

ನಮಗೆ ನಾವೇ ಕಾವಲು 

ಉಮ್ಮಳಿಸಿ ಬಂದ ಪ್ರೇಮ 

ತೋರುವುದು ಎಂದಿಗೆ?

ತುಂಬಿಸುವೆ ನೋಡು ನಲ್ಲೆ 

ಆಸೆಗಳ ಬಿಂದಿಗೆ 

ಆಲಿಸು ಪಿಸು ನುಡಿಯನ್ನು 

ಪೋಣಿಸು ನನ್ನ ಹೆಸರನ್ನು 

ಬಣ್ಣಿಸುವ ಯಾವ ಸಾಲು 

ಸಾಲೋದಿಲ್ಲ ಏತಕೆ

ಬಣ್ಣಗಳು ನಿನ್ನ ಕುರಿತೇ 

ಯೋಚಿಸುವ ವಾಡಿಕೆ 

ಎಲ್ಲವನೂ ನೀನೇ ಹೇಳಿ 

ಎದುರು ನೋಟವೇತಕೆ 

ನನ್ನ ಪಾಲಿಗಂತೂ ನೀನು 

ದೈವ ಕೊಟ್ಟ ಕಾಣಿಕೆ 

ಜನ್ಮಕೆ ನಿನ್ನ ವಿನಹ 

ಬೇಡಿಕೆ ಇಲ್ಲವೇ 

ನನ್ನ ಗೆಲುವೆಂದಿಗೂನು 

ನಿನ್ನದೇ ಅಲ್ಲವೇ 

ಕಂಪನ ನೀನಿಲ್ಲದ ವೇಳೆ 

ತಲ್ಲಣ ನೀನಿಲ್ಲದೆ ನಾಳೆ 

ಅಲೆ ಅಲೆಗಳ ಸಂಗೀತ

ಅಲೆ ಅಲೆಗಳ ಸಂಗೀತ 

ಮನಗಡಲಿಗೆ ಉಲ್ಲಾಸ 

ಮರೆತಂತೆ ತುಟಿ ಅರಳೋ ಸಮಯ 

ಪರಿ ಪರಿಯಾದ ಮಿಲನ 

ಪರಿಚಯದಲ್ಲೇ ಮಿಥುನ 

ಇದು ಪ್ರೀತಿ ಉಂಟಾಗೋ ವಿಷಯ 

ಕದ್ದು ಮುಚ್ಚಿ ಹೇಳಬೇಕು ಎಲ್ಲವನ್ನೂ ಬಾ ಬೇಗ 

ನಿನ್ನ ಬಿಟ್ಟು ಬೇರೆ ಏನೂ ಬೇಡೆನು ಏಕೋ 

ಸಣ್ಣ ಪುಟ್ಟ ಆಸೆಗಳು ರೆಕ್ಕೆಯನ್ನು ಪಡೆವಾಗ 

ಬಾನಿಗಾರಿ ಮೋಡ ಮುಟ್ಟಿ ಬರಬೇಕು 

ಬಂತು ಬದುಕೀಗ ನೆರವಾಗಿ 

ಮಳೆಗಾಲ ಶುರುವಾಗಿ 

ಒಲಿದಂಥ ವರವಾಗಿ.. ಪ್ರೀತಿಯು 

ಎಲ್ಲ ತಿರುವಲ್ಲೂ ಹೊಸತಾಗಿ 

ಬಿರಿದಂಥ ಸುಮವಾಗಿ 

ಒಲಿದ ಇಂಚರವೀಗ ಇನ್ನೂ ಸೊಗಸು 

ಕಲಿಸುವರಾರಿಲ್ಲ ಕಲಿತವರೇ ಎಲ್ಲ 

ಉಸಿರಾಟದ ರೀತಿ ಪ್ರೀತಿ ಪಾಠ 

ಅನುಭವಿಸಲು ಇನ್ನೂ ಅನುಭೂತಿಯ ನೀಡೋ 

ಸರಿ ದಾರಿಯ ತೋರಿ ಸೋಲಿಸುವಾಟ 

ಆಯಾ ತಪ್ಪಿ ಬೀಳುವ ವೇಳೆಲಿ 

ಚಾಚಿ ಹಿಡಿವ ನೆರಳು ನೀನು 

ಕಣ್ಣಿನಲ್ಲಿ ಮೂಡೋ ಬಿಂಬದಲಿ 

ನಿನ್ನನ್ನೇ ಹಿಡಿದಿಡುವೆ ನಾನು ಇನ್ನು 

ಅತಿ ಸುಲಭದ ಮಾತು, ನಿನ್ನೆದುರಲು ಕೂತು 

ನುಡಿಯುವ ಪ್ರತಿ ಬಾರಿ ಏನೋ ತೊಡಕು 

ಜೊತೆ ಕಳೆಯುವ ಸಮಯ, ಗತಿ ಬದಲಿಸಿದಂತೆ 

ತಳಮಳವೇ ತಾನೆ ಎಲ್ಲ ಕ್ಷಣಕೂ 

ತನ್ನ ತಾನೇ ಎರವಲು ಕೊಡುವಂತೆ 

ತೇಲಿ ಬಂತು ತಂಪು ಗಾಳಿ 

ನೀನು ಬರುವ ಕಾತರಿ ದೊರೆತಾಗ 

ತಂಗಾಳಿಯೂ ನಿಂತಂತಿದೆ ಕಾತರದಲ್ಲಿ 

ಎಲ್ಲ ಸಮಯ ನಿನದೇ ಜಪ

ಎಲ್ಲ ಸಮಯ

ನಿನದೇ ಜಪ

ನೀನಿರದೆ ಹೋದಲ್ಲಿ

ನಾನು ನೆಪ

ಕರಗೋದಕೆ ಸಜ್ಜಾಗುವೆ

ಕಣ್ಣೀರ ಧಾರೆಲೂ ನಿನ ಜ್ಞಾಪಕ

ಮಾತೇ ಬರದ ಮಗುವಾಗುವೆ

ನೀನೇ ಅರಿತು ಸಂಬಾಳಿಸು

ಹೇಳಬೇಕೀಗ ನೀನೇ ಸಂತ್ವನ

ನಿನ್ನ ಕೈಯಲ್ಲೇ ನನ್ನ ಜೀವನ

ನೀಡಬೇಡ ಬೇರೇನೂ ಕಾರಣ 

ನಿನ್ನ ಕೈಯಲ್ಲೇ ನನ್ನ ಜೀವನ 

ಯಾವುದೇ ದಿಕ್ಕಲಿ

ಸಾಗುತ ನಿಂತರೆ

ನೀನಿರೋ ಜಾಗವ

ಹುಡುಕುತ ಸೋಲುವೆ

ಕನ್ನಡಿ ಬೀರುವ

ನನ್ನಯ ನಗುವನು

ನೀ ಜೊತೆ ಇಲ್ಲದೆ

ನಂಬಲು ಸಾಧ್ಯವೇ

ಅಸಹಾಯಕ ಈ ಹೃದಯವು

ನಿನ್ನೆಸರಲೇ ಬಡಿದಾಡಿದೆ...

ಹೇಳಬೇಕೀಗ ನೀನೇ ಸಂತ್ವನ

ನಿನ್ನ ಕೈಯಲ್ಲೇ ನನ್ನ ಜೀವನ

ಸಾಗರ ಸಂಗಮ

ಕಾಣದ ನದಿಯಲಿ

ಸಿಲುಕಿದ ಹಾಗೆಯೇ

ನನ್ನೇ ನಾ ಕಂಡೆನು

ಸಂತೆಯ ಬೀದಿಯ

ನಿಲ್ಲದ ಗದ್ದಲ

ನನ್ನ ಈ ಮೌನಕೆ

ಬದಲಿಸಿಕೊಂಡೆನು

ಕನಸಾಗದೆ ನಿಜವಾಗಿರು

ಏಕೆ ಮನಕೆ ನೋವಾಗುವೆ..

ಮೊದಲ ಮಳೆ, ಕವಿದ ಮುಗಿಲೆಲ್ಲ.. ಈ ದಿನ

ಮೊದಲ ಮಳೆ

ಕವಿದ ಮುಗಿಲೆಲ್ಲ.. ಈ ದಿನ

ಎದುರು-ಬದುರು

ಸಿಗುವ ಬಾ ಈಗ.. ತಕ್ಷಣ

ಒಂದೇ ಕೊಡೆ ಸೂರಿದೆ

ಅಂತರವೇ ಇಲ್ಲದೆ

ನಿನ್ನ ಜೊತೆ ನಿಂತಾಗ

ಮಳೆ ಜೋರು ...

ಅಂಗೈಯ್ಯಲಿ ಹಿಡಿದ ಹನಿ

ಕೈ ಜಾರುವ ಮುನ್ನ 

ಎರಚೋಣವೇ ನಾವು

ಒಬ್ಬರಮೇಲೊಬ್ಬರು!

ಈ ಮಣ್ಣು ಹೂವಾಗಿ

ಘಂ ಎನ್ನುತಲೀಗ

ಹರಿವ ನೀರಿಗೆ

ಹತ್ತಾರು ಪ್ರಯೋಗ

ನಿಧಾನ ಒಂದೊಂದೇ 

ಎಲೆ ಬಿಂದು ತೊಟ್ಟಿಕ್ಕಿದೆ

ನೆಲ ಕಾದು ಕಾದು

ದಣಿದದ್ದು ಹೌದು

ಹಸಿ ಮೈಯ್ಯ ಹಸಿವಿನ್ನೂ

ನೀಗಲೇ ಬಾರ್ದು

ಆ ಸೂರ್ಯ, ಈ ಚಂದ್ರ

ವಿರಮಿಸಿಕೊಳಲಿ..

ತಾರೆಗಳೆಲ್ಲ ರಜೆ ಹಾಕಿವೆ

ಏನಿದ್ದರೂ ಬಾನಿಗೆ

ಮಿಂಚು, ಗುಡುಗು ಆಸರೆ

ಹಕ್ಕಿಗಳು ಗೂಡಿನೆಡೆ ಕಾಲ್ಕಿತ್ತಿವೆ

ಅದೆಷ್ಟೋ ಉಪ್ಪರಿಗೆ ಸೋರುತ್ತವೆ...

ಇಷ್ಟಾಗಿ ನಾವಿಬ್ಬರೂ

ಒಂದೇ ಸೂರಿನಡಿ

ಇನ್ನೂ ಮೈ ಮರೆತು

ತಿಳಿದಿಲ್ಲ ನಮಗೆ

ಮಳೆ ನಿಂತದು

ಅಥವ ನಮ್ಮನು ನೋಡಿ 

ನಿಂತಿರ ಬಹುದು..

ಮನದಾಳದ ಮಧುರ ದನಿ

ಮನದಾಳದ ಮಧುರ ದನಿ

ಬರಿದಾಗದ ಓ ಇಬ್ಬನಿ

ನವಿರಾದ ಪುಟದೊಂದಿದೆ

ಹೊಸ ಬಾಳು ತೆರೆದಂತಿದೆ

ನೀ ಬಂದು ಸಹಿ ಮಾಡಲು.. ಪ್ರೀತಿಯಲಿ..

ನಿನಗೆ ಹೇಳಲು

ಬಲು ಖಾಸಾ ಮಾಹಿತಿ

ಹೃದಯ ತುಂಬಿ ಬಂತು

ಅನುರಾಗ ಸಂಗತಿ

ಭಯವೇಕೋ ನನ್ನನು ಕಾಡಿದೆ

ಕನಸಲ್ಲೇ ಎಲ್ಲವ ಹೇಳಿದೆ..

ಸಲುಗೆ ಮೀರಲು

ಇದೆ ಗೆರೆಯ ಅಂತರ

ಎಲ್ಲ ಗುಟ್ಟುಗಳನು

ಹಂಚಿಕೊಳುವ ನಂತರ

ನೆರಳನ್ನು ನೆರಳಿದು ಸೋಕಲು

ಅದೂ ಕೂಡ ನಲ್ಮೆಯ ದಾಖಲು...

ಕತೆ ಹೇಳಬೇಕೊಂದ ನಿನಗೆ

ಕತೆ ಹೇಳಬೇಕೊಂದ ನಿನಗೆ 

ಜೊತೆಯಾಗು ಬಾ ಕೊನೆಯ ವರೆಗೆ 

ಹೇ ತಂಪು ಗಾಳಿ, ನೀ ಗಂಧ ಚೆಲ್ಲಿ

ಸುಳಿದಾಡಿಕೊಂಡೇ ಇರುವೆಯೇನು 

ಕತೆ ಹೇಳಬೇಕೊಂದ ನಿನಗೆ 

ನಮ್ಮ ಹೊರತು ಯಾರಿಲ್ಲ ಒಳಗೆ

ಹೇ ತಂಪು ಗಾಳಿ, ನೀ ಗಂಧ ಚೆಲ್ಲಿ

ಸುಳಿದಾಡಿಕೊಂಡೇ ಇರುವೆಯೇನು 

ನೂರಾರಿವೆ ನನ್ನಾಸೆಯು 

ನಾನೆಲ್ಲವ ಹೇಳಬೇಕು 

ನಿನ್ನಿಷ್ಟಕೆ ನೀ ಹೊರಟರೆ

ಏನೆಂದು ನಾ ತಿಳಿಯಬೇಕು 

ಹೃದಯದೊಳಗೊಂದು 

ಪದವ ಹೆಣೆವಾಗ

ಬಳಪ ಮುರಿದಂತೆ ಆಯಿತೇನೋ 

ಕತೆ ಹೇಳಬೇಕೊಂದ ನಿನಗೆ 

ಮಿತಿ ಮೀರುತ ಹೇಳೋ ಗಳಿಗೆ

ಹೇ ತಂಪು ಗಾಳಿ, ನೀ ಗಂಧ ಚೆಲ್ಲಿ

ಸುಳಿದಾಡಿಕೊಂಡೇ ಇರುವೆಯೇನು

ಕಣ್ಣಂಚಿಗೆ ಬಂದಂತಿದೆ 

ತಾರಾಗಣ ತಂದ ಮಿಂಚು 

ಬೆರಳೊಂದಿಗೆ ಬೆರಳ ಹಿಡಿ 

ಹೂಡುತ್ತಲಿ ಸಣ್ಣ ಸಂಚು 

ಕೊನೆಯೇ ಇರದಂಥ 

ಮೊದಲ ಸಾಲನ್ನು 

ತಿರುಗಿ ಮೊದಲಿಂದ ಹಾಡಲೇನು..

ಕತೆ ಹೇಳಬೇಕೊಂದ ನಿನಗೆ 

ಅತಿಯಾದ ಒಲವಲ್ಲೀ ಸಲುಗೆ 

ಹೇ ತಂಪು ಗಾಳಿ, ನೀ ಗಂಧ ಚೆಲ್ಲಿ

ಸುಳಿದಾಡಿಕೊಂಡೇ ಇರುವೆಯೇನು

ಎಲ್ಲೇ ಇರಲಿ ನಿಂದೇನೇ ಗುಣಗಾನ

ಎಲ್ಲೇ ಇರಲಿ 

ನಿಂದೇನೇ ಗುಣಗಾನ

ನಿನ್ನ ಮನಸೇ

ಆ ನನ್ನ ನಿಲ್ದಾಣ

ಓ ಸಖಿ, ನಿನ್ನಲ್ಲೇ ನಾ ಸುಖಿ

ಸಣ್ಣ ಆಸೆ

ಹೊತ್ತಂತೆ ರೆಕ್ಕೆನ

ಹಾರಿ ಬಿಡುವೆ 

ಈ ಪ್ರೀತಿ ಹೀಗೇನಾ

ಓ ಸಖಿ, ನಿನ್ನಲ್ಲೇ ನಾ ಸುಖಿ

ಬರಿದಾದ ಬಾಳಿಗೆ ಬಿರುದಾಗಿಸೋಣ

ಬಳಿಯುತ್ತಲಿ ಹೊಚ್ಚ ಹೊಸತಾದ ಬಣ್ಣ

ಕನಸೆಲ್ಲವ ಇಂದೇ ಒಂದಾಗಿಸೋಣ 

ಈ ಹಬ್ಬವ ಕೂಡಿ ಆಚರಿಸೋಣ

ಹಾಡಿ ಹೊಗಳಿ

ಸಾಕಾಗಿ ಹೋಗಿದೆ

ಆದರೂನೂ

ಈ ಹಾಡೇ ಮುಗಿಯದೇ

ಓ ಸಖಿ, ನಿನ್ನಲ್ಲೇ ನಾ ಸುಖಿ

ಒಂದೇ ಒಂದು 

ಮುದ್ದಾದ ಮಾತಾಡು 

ಮುತ್ತಿಗಾಗಿ 

ನನ್ನೊಡನೆ ಕಾದಾಡು 

ಓ ಸಖಿ, ನಿನ್ನಲ್ಲೇ ನಾ ಸುಖಿ

ಕಾದಿರುವೆನು ಮೂಡುವ ನಾಳೆಗೆ

ಕಾದಿರುವೆನು ಮೂಡುವ ನಾಳೆಗೆ

ಈ ದಿನವನು ಕೂಡಿಸೋ ಆಸೆಗೆ

ಮಾತೇ ಮುಗಿಯದ, ರಾತ್ರಿ ಹೀಗೇ ಸಾಗಲಿ

ನನ್ನ ಮನದ ಮುಗಿಲು

ಕರಗುವುದು ನಿನ್ನ ಬೇಗೆಗೆ

ಕಾಯೋ ಕೆಲಸ ಪಡೆದು

ಉರಿಸುವೆನು ನಿನ್ನ ದೀವಿಗೆ

ಕಣ್ಣು ಮುಚ್ಚಿ ಮಾಡೋದಾ ಧ್ಯಾನ?

ಎದುರೇ ಕೂರು ಬಿಡದೆ ನನ್ನನ್ನ.. ನೀ..

ನಾ ನಿನ್ನವ... ನಾ ನಿನ್ನವ

ನಾ ನಿನ್ನವ... ನಾ ನಿನ್ನವ.. 

ನೀರವ ನೀನಿರೆ ಸಲ್ಲದು

ನೀರಸ ಎಂಬುದೇ ಆಗದು

ಕಾಲವನ್ನು ಕಟ್ಟಿ ಹಾಕೋ

ಜಾಲವೊಂದ ಹೆಣೆಯಬೇಕು

ಯಾವುದೇ ಹಂಗಿಗೆ ಸೋಲದೆ

ಜಾರುವ ಈ ಕ್ಷಣ ನಮ್ಮದೇ.. ಓ..

ಕಾದಿರುವೆನು ಮೂಡುವ ನಾಳೆಗೆ

ಹೊಸತೀ ದಿನವನು ಕೂಡಿಸೋ ಆಸೆಗೆ

ಏನೂ ಅರಿಯದೆ, ಎಲ್ಲ ಅರಿತು ಪ್ರೀತಿಸು

ಬಾಕಿ ಉಳಿದ ಕನಸು

ನಿಜವೇ ಆದಂತೆ ತೋಚಲಿ

ನಮ್ಮ ಹೆಜ್ಜೆ ಗುರುತು

ನಮಗೇ ಹೊಸತಾಗಿ ಕಾಣಲಿ

ನಿನ್ನ ಬಿಟ್ಟು ನನ್ನ ನೆರಳಿಲ್ಲ

ಇದಕಿಂತ ಹೇಳೊಕೇನೂ ಉಳಿದಿಲ್ಲ.. ಹಾ.. 

ನಾ ನಿನ್ನವ... ನಾ ನಿನ್ನವ

ನಾ ನಿನ್ನವ... ನಾ ನಿನ್ನವ.. 

ಎಳನೀರು ಮಾರುವವಗೆ ದಣಿವಾಗದೇ?

ಎಳನೀರು ಮಾರುವವಗೆ ದಣಿವಾಗದೇ?

ಕೊಚ್ಚಿ ಒಂದಾದರೂ ಕುಡಿಬಾರದೇ?

ಬಿರು ಬಿಸಿಲ ಬೇಗೆಯಲಿ ಬೆಂದು ಬಸವಳಿದರೂ

ದಾಹಕಿಂತಲೂ ಜೇಬು ಮಿಗಿಲಾದುದೇ?

ಗಂಜಿ, ಪೇಪರ್ ಗಂಜಿ, ಬರಿ ನೀರ ಕಾಯಿ

ಯಾವುದಾವುದು ಎಂದು ಅವ ಹೇಗೆ ಬಲ್ಲ?

ಒಂದೊಂದ ಮೊಟಕುತ್ತ ಕಿವಿಗೊಟ್ಟು ನೋಡುವ

ಶಬ್ಧಾರ್ಥದ ಗುಟ್ಟು ಅವನಷ್ಟೇ ಬಲ್ಲ

ಮೂರೇ ಏಟಿಗೆ ಸೀಳಿ ತಲೆ ಬುರುಡೆಯನ್ನು

ಮಚ್ಚಿನ ಅಂಚಿಂದ ಕೊತ್ತು ತೂತಿಟ್ಟು

ಕೈಲಾಗದವರೆಲ್ಲ ಸ್ಟ್ರಾಗೆ ತಡಕಾಡಿದರು

ವೀರರು ತುಟಿಗೊತ್ತಿ ಎದೆಗಿಳಿಸಿಕೊಂಡರು

ಖಾಲಿ ಬೊಂಡವ ಹಾಗೇ ಎಸೆಯುವಂತಿಲ್ಲ

ಒಳಗೆ ತಿರುಳು ಇರಲಿ, ಇರದೆಯೇ ಇರಲಿ

ಹೋಳಾಗುವ ತನಕ ಕಾಲ್ಕಿತ್ತುವಂತಿಲ್ಲ

ಚೂರೇ ದಕ್ಕುವುದಾದರದೂ ದಕ್ಕಲಿ

ಒಂದೊಂದು ಸ್ತರದಲ್ಲಿ ಒಂದೊಂದು ಬೆಲೆ ನಿಗದಿ

ಮರದಲ್ಲಿ ಚಿಲ್ಲರೆ, ಇಳಿಸಿದರೆ ರೇಟು

ರೈತನಿಗೆ ಚಿಲ್ಲರೆ, ಮಾರುವವ ಗ್ರೇಟು

ರಸ್ತೆಯಲಿ ಚಿಲ್ಲರೆ, ಬಾಟ್ಲಿಯಲಿ ನೀಟು

ಸ್ಟಿಕ್ಕರ್ರು ಮೆತ್ತಿದರೆ ಸೂಪರ್ ಮಾರ್ಕೆಟ್ಟು...

ಹೋಗುವ ಬಾ ನನ್ನ ಇನಿಯ

ಹೋಗುವ ಬಾ ನನ್ನ ಇನಿಯ

ಬಾನಿನಂಚಿನ ಊರಿಗೆ

ನನ್ನ ನಿನ್ನ ಪ್ರೇಮ ವಿಷಯ

ಹೇಳಿ ಬರುವ ತಾರೆಗೆ

ನನ್ನ ಕುಂಚದ ಅಂಚಲಿ

ನಿನ್ನ ಹೆಸರಿನ ಇಂಚರ

ಸಂಕುಚಿತವೇನಲ್ಲದ

ಮೋಹ ತೀರದ ಸಾಗರ

ಹೇಳದ ನೂರಾರು ಮಾತು

ಆಯಿತೇಕೋ ಹೂ ನಗೆ

ಹೋಗುವ ಬಾ ನನ್ನ ಇನಿಯ

ಬಾನಿನಂಚಿನ ಊರಿಗೆ

ಸಣ್ಣದೀ ಹನಿಗವನವು

ಬೇಗ ಮುಗಿಸುವೆ ಆಲಿಸು

ಎಲ್ಲ ಸಾಲಿವು ನನ್ನವೇ

ನಿನ್ನ ಸಾಲನು ಸೇರಿಸು

ನೇರ ಹೇಳಲು ಆಸೆಗಳನು

ಏಕೋ ನಾಚಿಕೆ ಈ ಬಗೆ

ಹೋಗುವ ಬಾ ನನ್ನ ಇನಿಯ

ಬಾನಿನಂಚಿನ ಊರಿಗೆ

ಅಂತರ ಇನ್ನೇತಕೆ

ಉಸಿರು ಉಸಿರಿಗೆ ತಾಕಲಿ

ಸನಿಹದಲ್ಲಿಯೇ ಸಿರಿತನ

ಎಲ್ಲ ಎಲ್ಲೆಯೆ ಮೀರಲಿ

ಬಾಚಿಕೋ ಮನಸಾರೆ ನನ್ನ

ತಬ್ಬಿ ನಲಿಯಲಿ ಗುಂಡಿಗೆ

ಹೋಗುವ ಬಾ ನನ್ನ ಇನಿಯ

ಬಾನಿನಂಚಿನ ಊರಿಗೆ

ಕಡಲಾಳದಲ್ಲಿ ನಾನು

ಕಡಲಾಳದಲ್ಲಿ ನಾನು

ಅಲೆಯಾಗಿ ಓಡುವೆಯೇನು

ಮುಗಿಲನ್ನು ಸೇರಿಕೋ ಬೇಗ

ಬೆನ್ನ ಹಿಂದೆ ನಾ ಬರುವೆ..

ಬಿಡುಗಡೆ ನೀಡದೆ

ಸುರಿಮಳೆಯಾಗಿದೆ

ಅನುದಿನ ಸೋಲುವ

ಕನಸದು ನಿನ್ನದೇ

ಕಣ್ಣು ಕಣ್ಣ ಸೇರಿಸುವ ಸೇತುವೆಗೆ

ಕದ್ದು ಮುಚ್ಚಿ ನೋಡೋ ಸುಖ ಬೇಕಾಗಿದೆ

ಸಿಕ್ಕಿ ಬೇಳಬೇಕು ಬೀರೋ ಕಳ್ಳನಗೆ

ಹೆಚ್ಚು ಕಾಲ ದೂಡಬೇಡ ಪ್ರೀತಿಸದೆ

ನೂರಾರು ಭಾವದ

ಹೂಗುಚ್ಚ ನಿನ್ನಲಿ

ನಾನಾಗಲೇ ಸಖಿ

ಬಾಡದಿರೋ ಗುರಾಭಿ ಹೂ..

ಬಿಡುಗಡೆ ನೀಡದೆ

ಸುರಿಮಳೆಯಾಗುವೆ

ಅನುದಿನ ನಿನ್ನನೇ

ಕನಸಲೂ ಕಾಣುವೆ

ಮುಂಜಾನೆಯ ಹೊಂಬೆಳಕ

ಎದೆಗೊತ್ತಿ ಎಚ್ಚರಿಸು

ಹಾಗೇ ಮುಂದುವರಿಯುತಲಿ.. ಮೋಹಿಸಿ..

ಆಸೆಗಳ ಬಣ್ಣ ಬಣ್ಣ ಬೀಸಣಿಕೆ

ನಿನ್ನೆಡೆಗೆ ಗಾಳಿಯನ್ನು ಬೀಸುತಿದೆ

ಇದ್ದುಬಿಡಬೇಡ ಹಾಗೆ ನೋಡದೆಯೇ

ಅಂಗೈಯ್ಯಲ್ಲೇ ಜೀವವಿನ್ನೂ ಕಾಯುತಿದೆ

ಕಾರಂಜಿ ಮೂಡಿದೆ

ನೀ ಹಾಗೆ ನಾಚಲು

ರಂಗೋಲಿಯಾಗುವೆ

ತೆರೆ ಮನದ ಮುಂಬಾಗಿಲು....

ಆಲಿಸು, ಕೋಮಲೇ ಆಲಿಸು

ಆಲಿಸು, ಕೋಮಲೇ ಆಲಿಸು

ಆಲಿಸು, ಕೋಮಲೇ ಆಲಿಸು

ನಿನ್ನ ಅಂಗೈಯ್ಯ ಮೇಲೆ

ನನ್ನ ಈ ಜೀವನ

ಪ್ರಾಣಕೂ ಹೆಚ್ಚು ಪ್ರೀತಿಸಿ

ಹೊತ್ತು ಕೊಂಡಾಡುವೆ ದಿನ

ನಿತ್ಯ ಮಂದಾರ ಹೂವಂತೆ

ಅರಳುವ ನೀನೇ ಚಂದ

ನಿನ್ನ ಹೋಲೋ ಚೆಲುವೆ

ಕಂಡೇ ಇಲ್ಲ

ಇದ್ದರೆ ಸಾಕು ನಿನ್ನಲ್ಲಿ

ಬೇಡೆನು ಬೇರೆ ಏನೂ

ಸುಂದರ ಆವರಣ

ನೀನಿರೆ ಎಲ್ಲ

ಹತ್ತಿರ ಕೂರು ಇನ್ನೂ

ಬೇಕು ಒಂದು ಕ್ಷಣ

ಏನೋ ಹೇಳೋಕೆ ಹೋಗಿ

ಮೌನವ ತಾಳಿದೆ ಮನ.. 

ಪ್ರೇಮದ ರೂಪವ ಎಲ್ಲೂ

ಬಣ್ಣಿಸೋ ರೇಖೆಯಿಲ್ಲ

ನಿನ್ನ ಚಿತ್ತಾರವನೇ

ಬಿಡಿಸೋದೇನು?

ಸಾಗುವ ಕಾಲವು ನಮ್ಮ

ಕೈಯ್ಯಲಿ ನಿಲ್ಲದಲ್ಲ

ಕೂಡಿಟ್ಟುಕೊಳ್ಳೋಣ

ನೆನಪ ಜೇನು

ನಮ್ಮ ಸಾಂಗತ್ಯ ನೋಡಿ

ಚಂದಿರ ಮೂಕನಾ

ಬಾನಿಗೆ ಹಬ್ಬದಂತೆ

ಮಿಂಚಲು ತಾರಾಗಣ..

ಬಿಡುಗಡೆ ಬೇಡಿರುವ

ಬಿಡುಗಡೆ ಬೇಡಿರುವ

ತರಗೆಲೆ ನಾ

ನಿನಗೆಂದೇ ಚಿಗುರುವೆನು 

ಮರಳಿ ದಿನ

ಎಳೆ ಬಿಸಿಲ ಬಯಸಿರಲು 

ಮಳೆ ಹನಿಯ ಜೊತೆ ಬರುವೆ..

ಅರಳೋ ಗಳಿಗೆ

ಕರೆದು ಬಳಿಗೆ

ನಗುವ ನನ್ನನ್ನು ಇನ್ನೂ ಚಂದಗೊಳಿಸು

ಬಾರೋ ಬೇಗ, ಬಾರೋ ಬೇಗ, ಬಾರೋ ಬೇಗ

ನಿಂದೇ ಗುಣಗಾನವಿನ್ನು

ನೀನೇ ನೆನಪು ಕೂಡಿಟ್ಟ ಜೇನು

ನಿನಗಾಗೇ ಬಾಳುವೆ ನಾನಿನ್ನೂ

ಒಲವ ಸೆಲೆಯ ಕಡಲಲ್ಲಿ 

ಸಾಗುತ್ತಿರೋ ಹಡಗಂತೆ ನಾವು

ಸಾಲು, ಸಾಲು ಅಲೆಯ ಜೊತೆಗೆ

ಗುರಿಯಿಲ್ಲದಂಥ ರೋಚಕ ಪಯಣವಿದು

ಓ.. ಗುರಿಯಿಲ್ಲದಂಥ ರೋಚಕ ಪಯಣವಿದು

ಈ ಕೆಂದಾವರೆಯೊಂದು

ಒಂಟಿ ಕೊಳದೊಳಗೆ

ದೂರದಲ್ಲಿರೋ ನಿನ್ನ

ಧ್ಯಾನ ಮನದೊಳಗೆ

ಅವಸರದಲ್ಲಿ ಅರೆಗಳಿಗೆ

ಬಂದು ಹೋಗು.. ನಲ್ಲ..

ನೀಗದ ಒಂದು ನೀಳ ದಾಹ

ನೀಗಲೆಂತೋ ತಿಳಿಯದಾಗಿದೆ

ಜಾರೋ ಹನಿಯ

ತಡೆದು ಹಿಡಿದಿಡು

ನೀ ಅಳದಿರು ನಾ ಬರುವೆ...

ಅರಳೋ ಗಳಿಗೆ

ಕರೆದು ಬಳಿಗೆ

ನಗುವ ನನ್ನನ್ನು ಇನ್ನೂ ಚಂದಗೊಳಿಸು

ಬಾರೋ ಬೇಗ, ಬಾರೋ ಬೇಗ, ಬಾರೋ ಬೇಗ

ನೀಲಿ ನೀಲಿ ಅಂಬರದಿ

ನೀಲಿ ನೀಲಿ ಅಂಬರದಿ

ಚಂದ್ರಮುಖಿ ಕಂಡೆ

ಮೋಹಕೊಳಗಾದೆ

ಪ್ರೀತಿಯಲಿ ಮಿಂದೆ

ಪದವಿ ಬೇಕಾಗಿಲ್ಲ

ಅನುಭವ ಏನಿಲ್ಲ

ಸೋಲುತ ನಾ ಪ್ರೇಮಿಯಾದೆ

ಸಾಲು ಸಾಲು ದಾಳಿ

ತಡೆಯುತ್ತ ಬಂದೆ ನೋಡು

ಒಂದೇ ಬಾಣ ನಿಂದು

ಹೀಗಾಯ್ತು ನನ್ನ ಪಾಡು

ಮುಚ್ಚುಮರೆಯೇನಿಲ್ಲ

ಸ್ವಚ್ಛ ಮನದ ನಲ್ಲ

ನಿನ್ನ ಹೊರೆ ಹೊರುತಾನೆ

ಪ್ರೀತಿ ಮಳೆಗರೆತಾನೆ

ಪದವಿ ಬೇಕಾಗಿಲ್ಲ

ಅನುಭವ ಏನಿಲ್ಲ

ಸೋಲುತ ನಾ ಪ್ರೇಮಿಯಾದೆ

ನೀಲಿ ನೀಲಿ  ಅಂಬರದಿ

ಚಂದ್ರಮುಖಿ ಕಂಡೆ

ಮೋಹಕೊಳಗಾದೆ

ಪ್ರೀತಿಯಲಿ ಮಿಂದೆ

ತಪ್ಪೋ ವೊಪ್ಪೋ ನಾನು

ಇರಿಸಾಯ್ತು ಹೆಜ್ಜೆ ಮುಂದೆ 

ಕುಣಿಯೋ ಕೆಲಸ ನಂದು

ನೀನೇಕೆ ಗೆಜ್ಜೆ ತಂದೆ?

ಗಂಧ ತೀಡಿ ಬಂತು

ಜೇನಿನಂಥ ಮಾತು

ಕೇಳುಗ ನಾನಾದೆ

ಗೀಚುತ ಕವಿಯಾದೆ

ಪದವಿ ಬೇಕಾಗಿಲ್ಲ

ಅನುಭವ ಏನಿಲ್ಲ

ಸೋಲುತ ನಾ ಪ್ರೇಮಿಯಾದೆ..

ಒಲವೇ.. ಒಲವಾದಾಗಲೇ ವಿಸ್ಮಯ

ಒಲವೇ.. ಒಲವಾದಾಗಲೇ ವಿಸ್ಮಯ

ಒಲವೇ.. ಒಲವೇ.. ಇದು ಬರಿದಾಗದ ಅಕ್ಷಯ

ಮೂಡೋ ಮುಂಗಾರು

ಜಾರೋ ಕಣ್ಣೀರು

ಕಾಯಿಸಿ, ಕಾಡಿಸಿ

ಮೋಹಿಸೋ ಮೋಡಿಯೇ ಸುಂದರ

ಒಲವೇ.. ಒಲವಾದಾಗಲೇ ವಿಸ್ಮಯ

ಒಲವೇ.. ಒಲವೇ.. 

ಕಣ್ಣಂಚ ಕಾಡಿಗೆ

ತುಸು ಮಾಸದ ಹಾಗೆ

ತೀಡುತ್ತ ಗಲ್ಲ ತಾಕಲೇನು?

ತುಟಿಯನ್ನು ಸೋಕುವ

ಗಾಳಿ ಮುತ್ತನೊಂದ

ನಿನ್ನೆಡೆ ಹಾರಿಬಿಡಲೇನು?

ಬರದೆ ಸತಾಯಿಸೋ ನಿದಿರೆಯೂ ನಿನ್ನ (೨)

ಜೋಗುಳ ಬೇಡಿದೆ 

ಚಂದ ಕೊರಳಿಂದ ಹೊರ ಹೊಮ್ಮಲು

ಒಲವೇ.. ದಣಿವ ನೀಗೋ ನದಿಯಾಗಿರು 

ಒಲವೇ.. ಒಲವೇ.. ಮನಕೆ ನೀನೇ ಮೊದಲಾಗಿರು

ಬಿಡುಗಡೆಯಲ್ಲೂ 

ನಾ ಸೆರೆಯಾಳು

ನನ್ನ ಆವರಿಸೋ 

ಹೂ ಗಂಧ ನೀ ತಂದರೇನೇ ಹಿತ..

ಒಲವೇ.. ಒಲವಾದಾಗಲೇ ವಿಸ್ಮಯ

ಒಲವೇ.. ಒಲವೇ..

ನಾನಾರವ ನಾರವನೆನ್ನುವ

ನಾನಾರವ ನಾರವನೆನ್ನುವ 

ನೀ ಇವನಾರವನೆಂದರೆ 

ಈ ಇವ ನಿನ್ನವ ನಿನ್ನವನೆನ್ನುವನೆಂದಿಗೂ ಎನ್ನುವ

ನಾನೇ ನಿನ್ನವನೇ?

ನಾನಾರವನೆಂದರೆ ನಿನ್ನವನೆನ್ನುವೆ-

-ನೀ ಅವತಾರದಿ ನಿನ್ನೆದುರಾಗುವೆ-

-ನಾದರೆ ನಿನ್ನವನಾಗುವೆನಲ್ಲದೆ

ಬೇರೆ ಯೋಚಿಸೆನೆ!

ಈ ನೀರವವೇತಕೆ ಮಾತಿಗೆ ಸೋಲುವ

ಜೀವವ ತಾಕುವ ನಲ್ಮೆಯ ಯಾನವನೆಲ್ಲವ 

ದಾಟವ ಕೈಯ್ಯನು ಚಾಚುವೆ

ಬಾರೆ ನನ್ನೊಡನೆ!

ಮುತ್ತು ಮುತ್ತು ಸೇರಿಕೊಂಡ ದಾರವೇ

ಮುತ್ತು ಮುತ್ತು ಸೇರಿಕೊಂಡ ದಾರವೇ

ಕುಂದಣದಿ ಮಿಂದು ಮಿಂಚೋ ಹಾರವೇ

ರೇಷಿಮೆಯ ನಾಚಿಸುವ ಬಣ್ಣವೇ

ಕಣ್ಣಿಗೊತ್ತಿಕೊಳ್ಳುವಂಥ ಅಂದವೇ

ದೇವ ದೇವತೆಗಳೆಲ್ಲರೂ

ಧರೆಗಿಳಿದು ಬಾಳಿಗೊಪ್ಪಿಸಿರುವಂಥ ದೇವತೆಯೇ

(ಕರೆ ತಂದು ನನ್ನ ಬಾಳಿಗೊಪ್ಪಿಸಿದ ದೇವತೆಯೇ)

ವೇದ ವಾಕ್ಯವೇನೆಂದರೂ

ಸರಿ ದಾರಿ ತೋರಿಸು ನಾ ಮುನ್ನಡೆವೆ ನಿನ್ನಂತೆಯೇ

ಬಂದಳಮ್ಮ, ಬಂದಳಮ್ಮ ಪ್ರೀತಿ ತಂದಾಳಮ್ಮ

ಕೈ ತುತ್ತು ಹಾಕಿ ಪ್ರೀತಿ ಹಂಚುತ್ತಾಳಮ್ಮ

ಬಂದಳಮ್ಮ, ಬಂದಳಮ್ಮ ಮುದ್ದು ಮಾತಿನ ಗುಮ್ಮ

ಕಣ್ಣಾಯಿಸುವಲ್ಲೆಲ್ಲೆಲ್ಲೂ ನೀನೇನಮ್ಮ

ಸರಿ ಉತ್ತರವಿಲ್ಲ

ಪ್ರಶ್ನೆಗಳಾವುದಕೂ

ತಪ್ಪನ್ನು ಬೇಕಂತ ಮಾಡೋದಾ?

ತುದಿಗಣ್ಣಲಿ ಕೂತು

ಕಾಡಿಗೆಯ ಮರೆಗೆ

ನನ್ನಾಸೆ ಎಲ್ಲಾನೂ ಹೇಳೋದಾ?

ಸಣ್ಣ ಪುಟ್ಟ ಕೋಪ ರಂಗು ಹೆಚ್ಚಿಸೋಕೆ

ಸೆರಗಲ್ಲೇನೇ ಇರುವೆ ಮಾಡು ಚೂರು ಜೋಕೆ

ಮಾತಿನಲ್ಲೇ ಪದ್ಯ-ಪ್ರಾಸ ಹೇಳುವಾಕೆ

ನೀನೇ ಸಾಕು ಇನ್ನು ಬೇರೆ ಕಾವ್ಯ ಬೇಕೆ

ಏಕಾಂತಕ್ಕೆ ನೀನಿರುವಾಗ

ಅದೇಕಿಂತ ಬಿಗುಮಾನವೀಗ..

ಬಂದಳಮ್ಮ, ಬಂದಳಮ್ಮ ಪ್ರೀತಿ ತಂದಾಳಮ್ಮ

ಆ ಮಡಿಲೇ ನನ್ನ ತೂಗುಯ್ಯಾಲೆ ಕೇಳಮ್ಮ

ಬಂದಳಮ್ಮ, ಬಂದಳಮ್ಮ ಮುದ್ದು ಮಾತಿನ ಗುಮ್ಮ

ನಗುವಲ್ಲೇ ಜೋಗುಳ ಹಾಡೋ ಕಲೆಯು ನಿಂದಮ್ಮ

ಅತಿ ಎತ್ತರ ಶಿಖರ

ನಾವೇರಲು ಜೊತೆಗೆ

ದಣಿವನ್ನೇ ಕಂಡಿಲ್ಲ ಅದು ಹೇಗೆ?

ಪ್ರೇಮಾಮೃತವನ್ನು

ನೀ ಉಣಿಸಿದ ಗಳಿಗೆ

ನನಗೀಗ ಅರಿವಾಯ್ತು ತಡವಾಗಿ

ತಂಟೆ ಮಾಡೋ ತುಂಟನಾಗಬೇಕೇ ಹೇಳು?

ಗಂಟೆಗೊಮ್ಮೆ ನಿನ್ನ ಮುದ್ದು ಮಾಡೋ ಗೀಳು

ಬೇರು ಬಿಟ್ಟ ಹಾಗೆ ಬಾಳಿನಲ್ಲಿ ನಿಲ್ಲು

ಗಟ್ಟಿಯಾಗಿ ಕೈಯ್ಯ ಹಿಡಿವೆ ಕನಸಿನಲ್ಲೂ

ನಿರಾತಂಕ ನೀನಿರುವಾಗ

ಇರೋದೊಂದೇ ಹೃದಯಾನೂ ನಿಂದೇ..

ಬಂದಳಮ್ಮ, ಬಂದಳಮ್ಮ ಪ್ರೀತಿ ತಂದಾಳಮ್ಮ

ನನ್ನ ಪೂರ್ತಿ ಈಗ ನೀ ಆವರಿಸಮ್ಮ

ಬಂದಳಮ್ಮ, ಬಂದಳಮ್ಮ ಮುದ್ದು ಮಾತಿನ ಗುಮ್ಮ

ಜನ್ಮ ಜನ್ಮಕೂ ನಿನ್ನ ಬಿರುದೇ ಬೇಕಮ್ಮ..

ಕಣ್ಣಲ್ಲಿ ಕಣ್ಣಿಟ್ಟು ಕರೆದರೆ

ಕಣ್ಣಲ್ಲಿ ಕಣ್ಣಿಟ್ಟು ಕರೆದರೆ

ಕದ್ದೋಡಿ ಕಳುವಾಗುವೆ

ನಿಂತಲ್ಲೇ ನಾ ನಿಂತೆನಾದರೂ

ನೀನೆಲ್ಲೋ ಮರೆಯಾಗುವೆ

ಎಲ್ಲೆಂದು ನಾನಿನ್ನ ಹುಡುಕಲಿ

ಸೋತಂತೆ ಶರಣಾಗುವೆ

ಕಣ್ಣಲ್ಲಿ ಕಣ್ಣಿಟ್ಟು ಕರೆದರೆ

ಕದ್ದೋಡಿ ಕಳುವಾಗುವೆ

ಕಾರಂಜಿ ನಿನ್ನನ್ನು ನೋಡಲು

ಚಿಮ್ಮುತ್ತ ಹೊರ ಹೊಮ್ಮಿದೆ

ನಾನಂಜಿ ಮರೆಯಲ್ಲಿ ಇಣುಕಿದೆ

ಏನೊಂದೂ ಮಾತಾಡದೆ

ಕ್ಷಣವೊಂದು ಸರಿದಿತ್ತೋ ಏನೋ

ಹಿಂತಿರುಗಿ ಕಂಡಾಗ ನಾನು

ನೀನಲ್ಲಿ ನಾಪತ್ತೆಯಾಗಲು

ಹುಡುಕಾಟ ನಿಲ್ಲುತ್ತಾ ಏನು

ನೀನನ್ನ... ನಾನಿನ್ನ...

ಕೊಂಡಾಡಿಕೊಳ್ಳುತ್ತ ಕುಳಿತರೆ

ಈ ಲೋಕ ಬೆರಗಾಗಿ ನೋಡಲಿ..

ಎದುರಾಗಿ ಏನಾಯಿತೆನ್ನುವೆ

ಏನೆಂದು ನಾ ಹೇಳಲಿ

ಮಾತೆಲ್ಲ ಕೊರಳಲ್ಲೇ ಸಿಲುಕಲು

ತುಟಿಯಲ್ಲಿ ನಗು ಮೂಡಲಿ

ಒಂದೊಂದೇ ಸಂದೇಹ ಬೇಗನೆ

ತನ್ತಾನೇ ಬಗೆಹರೆಯುವಂತೆ

ನನ್ನಂತೆ ನಿನ್ನಲ್ಲೂ ಘರ್ಷಣೆ

ಇನ್ನೇನು ಒಲವಾಗುವಂತೆ

ನೀ ನಲ್ಲೆ... ನಾ ನಲ್ಲ

ಬೇರೇನೂ ಬೆಕಿಲ್ಲ ನಮಗಿದೋ

ಈ ವೇಳೆ ಚಿರಕಾಲ ಉಳಿಯಲಿ...

ಬಾ ಮುಗಿಲಾಚೆ

ಬಾ 

ಮುಗಿಲಾಚೆ ಒಂದು 

ಮನೆ ಮಾಡುವ 

ಈ 

ಒಲವೆಂಬ ಹೆಸರ 

ಅದಕಿರಿಸುವ 

ನೂರಾರು ಬಣ್ಣ 

ಅಲ್ಲಲ್ಲಿ ಖಾಲಿ ಬಿಳಿ ಬಣ್ಣ 

ನಾನೊಂದು ಸಾಲು 

ನೀನೊಂದು ಸಾಲು 

ಮನೆಗೊಪ್ಪುವ ಹಾಗೆ 

ಮನಕೊಪ್ಪುವ ಹಾಗೆ 

ಗೀಚೋಣ.. 

ಗೀಚಿ ಸಾಗೋಣ..

ಮಾಳಿಗೆಯ ಮೇಲೆ 

ಒಣಗಿಸಲು ಸಂಡಿಗೆ 

ಹನಿ ಬರುವ ಆತಂಕವಿರಲಿ 

ಮೊಗಸಾಲೆಯಲಿ ಬಿಟ್ಟ 

ರಂಗೋಲಿಯೊಳಗಿಂದ 

ರಾಗ ಲಹರಿ ಹೊಮ್ಮಿ ಬರಲಿ 

ಬಿಡಿಗಾಸು ಗಿಟ್ಟದ 

ಪದ್ಯಗಳ ಬರೆದು 

ಹೊಂಗನಸು ಕಾಣುತ 

ಮುತ್ತುಗಳ ಬೆಸೆದು 

ಸಂತೆಯಲಿ ನಮಗಿಂತ 

ಸಿರಿವಂತರಿರಬಹುದೇ 

ನೋಡಿ ಬರುವ ಬಾ…

ಚಿಗುರು ಕಾಲದ ತಳಿರು 

ತರಗೆಲೆಗಳಾದವು 

ಹಗುರ ಹೆಜ್ಜೆಯ ಇಡಲು 

ಮಾತಿಗಿಳಿದಾವು 

ನಿಂತು ಸಾಗುವ ಮುಂದೆ 

ಆಲಿಸಿ ಪ್ರಶ್ನೆಗಳ 

ಹೂದೋಟ ತಲುಪಲು 

ತಾಲೀಮು ಬೇಕು 

ದೊಂದಿಯೊಂದನು ಉರಿಸಿ 

ಕತ್ತಲನು ದಾಟುವ 

ಕಣ್ಣಿನ ಮಾತುಗಳ

ನಾವರಿತುಕೊಳ್ಳುವ 

ಬಾ ಗೆಳತಿ ಬಾ..

ಎದೆಗೊರಗುವುದು ಸಾಕು 

ಉಸಿರು ಉಸಿರಿಗೆ ಸಿಗಲಿ 

ಅಷ್ಟು ಹತ್ತಿರ ಬಾ 

ತುಟಿಗೆ ತುಟಿ ಗೀರುತಲಿ 

ಆವರಣ ಬೆಚ್ಚಗಿರಿಸುವ 

ಸರಿದು ಬಾ 

ದಣಿದ ಸರೋವರಕೆ 

ಬೆವರಿಳಿಸುವ 

ಕೆಸರು ಕಚ್ಚಿದ ದೋಣಿ 

ಹೊರಗೆಳೆಯುವ 

ಬಾ ವಿಹರಿಸುವ 

ತರಂಗಳ ಮೂಡಿಸಿ 

ಅಂತರಂಗದ ಸಮರ 

ಶಮನಿಸಲಿ ಬಾ 

ಬಾ ಸಖಿ ಬಾ…

ನನ್ನ ನಿನ್ನ ಸ್ನೇಹ

ನನ್ನ ನಿನ್ನ ಸ್ನೇಹ

ಎಷ್ಟು ಸುಂದರ 

ಇನ್ನೂ ಹೇಳಬೇಕು 

ಬರಲೇ ಹತ್ತಿರ 

ಕಾರಣ ಇಲ್ಲದೆ 

ಪ್ರೀತಿ ಆಗದು 

ಪ್ರೀತಿ ಆಗಲು 

ಗೊತ್ತೇ ಆಗದು 

ದೂರ ಆದರೂ 

ಬಿಟ್ಟು ಹೋಗದು 

ಪ್ರೀತಿ ಇಲ್ಲದ

ಲೋಕ ಯಾವುದು..

ಇಬ್ಬರಲೂ ಒಬ್ಬರಿಗೊಬ್ಬರ 

ಮೇಲೆ ಇರೋ ಮೋಹ ನಿರಂತರ 

ಸುತ್ತುವರಿ ಗದ್ದಲವಿದ್ದರೂ 

ಸರಾಗ ಸುಯೋಗವೇ ನಿನ್ನ ಇಂಚರ 

ಗೆದ್ದಿರುವೆ ನನ್ನಯ ಮನಸನು 

ಮುದ್ದಿಸಲು ಅನುಮತಿಯೇತಕೆ 

ಮದ್ದಿರದ ಖಾಯಿಲೆ ಪ್ರೀತಿಯು 

ಆಗಾಗ ಒತ್ತಾಯ ಮುತ್ತೆಂಬ ಲೆಹಕೆ 

ನಿನ್ನಂದ ಕಂಡ ಮೇಲಿಂದ

ನಿನ್ನಂದ 

ಕಂಡ ಮೇಲಿಂದ 

ಲೋಕವೆಲ್ಲ ಅಂದವಾಗಿದೆ 

ಏನನ್ನು 

ಹೇಳಬೇಕೀಗ 

ಮಾತು ಕೂಡ ಮೌನ ತಾಳಿದೆ 

ಮನಸ್ಸು ತುಂಬಿಸೋ 

ವಿಚಾರ ನಿನ್ನದು 

ಕನಸ್ಸಿನಲ್ಲೂ ಮಾಡೋದು

ನಿನ್ನ ಜಪ 

ಹತ್ತಾರು ಬಾರಿ 

ಪ್ರೀತಿಲಿ 

ನಾ ಬಿದ್ದು ಏಳುವೆ

ಈ ಹುಡುಗ ಪಾಪ ಇಷ್ಟು ಗೋಳಾಡಲು 

ಒಂದಿಷ್ಟು ಕರುಣೆ ಬಾರದೇ?

ಈ ಜನುಮವನ್ನು ನಿನಗೆ ಮೀಸಲಿಟ್ಟನು 

ನೀ ಪ್ರೀತಿ ಮಾಡಬಾರದೇ?

ಇಂಥ ಮಂದಹಾಸ 

ಎಂದೂ ಮೂಡೇಯಿಲ್ಲ 

ಬೇರೆ ಇಲ್ಲ ಕಾರಣ 

ನಿನ್ನ ಸನಿಹವನ್ನು 

ನಾನಾಚರಿಸುವಾಗ 

ಎಂಥ ರೋಮಾಂಚನ 

ಕರಗಿ ಹೋದಾಗ 

ಆ ನಿನ್ನ ಬೊಗಸೆ ಕೊಡು 

ಮರುಗಿ ಕೂತಾಗ 

ನೀ ಬಂದು ರಮಿಸಿ ಬಿಡು 

ಹೆಚ್ಚಾಯಿತಿನ್ನೂ ಈ ಹುಚ್ಚು

ಏನಿಂಥ ಅಚ್ಚರಿ…

ಈ ಹುಡುಗ ಪಾಪ ಇಷ್ಟು ಗೋಳಾಡಲು 

ಒಂದಿಷ್ಟು ಕರುಣೆ ಬಾರದೇ?

ಈ ಜನುಮವನ್ನು ನಿನಗೆ ಮೀಸಲಿಟ್ಟನು 

ನೀ ಪ್ರೀತಿ ಮಾಡಬಾರದೇ?

ಇರಲಾರೆ ನಾನು

ಇರಲಾರೆ ನಾನು

ಇರುವಂತೆ ಇನ್ನೂ

ನೀನಿರದೆ ನನ್ನ ಜೊತೆಗೆ

ಕರೆವಾಗ ನಿನ್ನ

ಬರಲಾರೆಯೇನು

ನೀ ಹಾಗೇ ಒಂದು ಗಳಿಗೆ

ಇರುಳಲ್ಲಿ ಕಂಡೆ

ಕಿರು ದೀಪದಂತೆ

ಈ ದಾರಿ ಮುಗಿವವರೆಗೆ

ಹಗಲೆಲ್ಲ ನಿನ್ನ

ಕನವರಿಕೆಯಲ್ಲಿ

ಏನನ್ನಬೇಕೀ ಸ್ಥಿತಿಗೆ

ಹೋರಾಟ, ಹೋರಾಟ

ಬದುಕೆಲ್ಲ ಚೀರಾಟ

ಆಸೆ, ಹಂಬಲ

ತಂದಿಟ್ಟ ಒದ್ದಾಟ

ಪ್ರೀತಿ ಜೊತೆಗಿದ್ದೂ

ಏನಿಂಥ ಹುಡುಕಾಟ...

ಸುಮಗಳ ಸಭೆಯೊಳಗೆ ನೋಡು

ಸುಮಗಳ ಸಭೆಯೊಳಗೆ ನೋಡು

ಕೆಣಕುವ ದುಂಬಿಗಳ ಬೀಡು

ಗಿಜಿ ಗಿಜಿತ, ಜಿಗಿ ಜಿಗಿತ

ಮಧುಸುಧೆ ಅನುಭವದ ಹಾಡು

ತರು ಲತೆಗಳೇ ನಿಮಗೆ ಇನ್ನೂ

ಬಿಡುವಿನ ಸಮಯವಿದೆ ಏನು?

ಕದ ಮುರಿದು, ಬಳಿ ಕರೆದು

ಬಯಕೆಯ ತೆರೆದಿಡುವೆ ನಾನು...

ಹೇಳು ಕವಿದ ಮೇಘ

ಹೇಳು ಕವಿದ ಮೇಘ

ಹೇಳು ಕವಿದ ಮೇಘ

ಎದು ಎಂಥ ಚಂದ ಯೋಗ

ಧರೆಗಿಳಿದು ಬಂದ ಈಗ

ನಾ ನೆನೆದು ಹೋದೆ ನಿನ್ನ ಗುಂಗಲೇ

ನೀ ಬರದೆ ಹೋದರೇನು ಮಾಡಲೇ

ನಿನಗೇ ಎಲ್ಲ ಸಮಯ

ನಿನದೇ ನನ್ನ ಹೃದಯ

ಹರೆಯಕೊಂದು ಬಯಕೆಯಿಂದು

ನೀನೇ ಬೇಕು ಎಂಬುದಾಗಿ

ಸವಿಯ ಮಾತು ಸಿಹಿಯ ಜೇನು

ಸವಿದೆನೀಗ ಪ್ರೀತಿಯಾಗಿ

ಪರಿಸರ ಬದಲಾಗಿದೆ

ಅವಸರ ಅತಿಯಾಗುತಾ

ಕನಿಕರ ತುಸು ಇಲ್ಲವೇ

ಬಳಲುವೆ ದೂರಾಗುತಾ

ನಿನದೇ ಕನಸಿನಲಿ

ನನಗೆ ಪಾಲು ಕೊಡು

ಉಳಿವೆ ಕೊನೆವರೆಗೂ ನಗುತಾ

ಇರಿಸು ಮನಸಿನಲಿ

ನಿನ್ನ ಕವಿತೆಗಳ

ಓದೇ ಬರುವೆನು  ಅನವರತಾ

ನೀನಗಾಗೇ ನನ್ನ ತುಡಿತ...