ಹೋಗುವ ಬಾ ನನ್ನ ಇನಿಯ
ಬಾನಿನಂಚಿನ ಊರಿಗೆ
ನನ್ನ ನಿನ್ನ ಪ್ರೇಮ ವಿಷಯ
ಹೇಳಿ ಬರುವ ತಾರೆಗೆ
ನನ್ನ ಕುಂಚದ ಅಂಚಲಿ
ನಿನ್ನ ಹೆಸರಿನ ಇಂಚರ
ಸಂಕುಚಿತವೇನಲ್ಲದ
ಮೋಹ ತೀರದ ಸಾಗರ
ಹೇಳದ ನೂರಾರು ಮಾತು
ಆಯಿತೇಕೋ ಹೂ ನಗೆ
ಹೋಗುವ ಬಾ ನನ್ನ ಇನಿಯ
ಬಾನಿನಂಚಿನ ಊರಿಗೆ
ಸಣ್ಣದೀ ಹನಿಗವನವು
ಬೇಗ ಮುಗಿಸುವೆ ಆಲಿಸು
ಎಲ್ಲ ಸಾಲಿವು ನನ್ನವೇ
ನಿನ್ನ ಸಾಲನು ಸೇರಿಸು
ನೇರ ಹೇಳಲು ಆಸೆಗಳನು
ಏಕೋ ನಾಚಿಕೆ ಈ ಬಗೆ
ಹೋಗುವ ಬಾ ನನ್ನ ಇನಿಯ
ಬಾನಿನಂಚಿನ ಊರಿಗೆ
ಅಂತರ ಇನ್ನೇತಕೆ
ಉಸಿರು ಉಸಿರಿಗೆ ತಾಕಲಿ
ಸನಿಹದಲ್ಲಿಯೇ ಸಿರಿತನ
ಎಲ್ಲ ಎಲ್ಲೆಯೆ ಮೀರಲಿ
ಬಾಚಿಕೋ ಮನಸಾರೆ ನನ್ನ
ತಬ್ಬಿ ನಲಿಯಲಿ ಗುಂಡಿಗೆ
ಹೋಗುವ ಬಾ ನನ್ನ ಇನಿಯ
ಬಾನಿನಂಚಿನ ಊರಿಗೆ
No comments:
Post a Comment