ಶರಣಾಗತ

ಬೀಳಬಲ್ಲೆ ನಿನ್ನ ಬಲೆಗೆ
ಹೇಳು ಎಂದು ಹೆಣೆಯುವೆ?
ಕಣ್ಣಿನಲ್ಲೇ ತಾಳ ಹಾಕು
ಹುಚ್ಚನಂತೆ ಕುಣಿಯುವೆ!!

 

ಜೀವ ಭಾಗದಲ್ಲಿ ನನ್ನ
ಸಣ್ಣ ಭಾಗಿಯಾಗಿಸು
ನನ್ನ ಬಯಕೆಯಲ್ಲಿ ನಿನ್ನ
ಬೇಡಿಕೆಗಳ ಕೂಡಿಸು 

 

ದಾರಿ ತಪ್ಪಿ ಬಂದಮೇಲೂ
ಬಾರಿ ಬಾರಿ ಸಿಕ್ಕುವೆ
ಅಲ್ಲೇ ಅನಿಸಿತೆನಗೆ ನೀನು
ನನಗೆ ಮಾತ್ರ ದಕ್ಕುವೆ

 

ಸುತ್ತುವರಿದ ಗೋಜಲನ್ನು
ಮಿಥ್ಯವಾಗಿಸೋಣವೇ?
ಚಾಚಿಕೊಂಡ ಕೈಯ್ಯ ಹಿಡಿಗೆ
ಜೋಡಿ ನಡಿಗೆ ಸಖ್ಯವೇ!!

 

ಗುಳೆ ಹೊರಟ ಹೃದಯಕಿಂದು
ನೆಲೆ ಸಿಕ್ಕ ಭಾವನೆ
ಶಿಲೆ ಎಂದು ಕರೆದು ನಿನ್ನ
ಶುರುವಿಡಲೇ ಬಣ್ಣನೆ?!!

 

ಎಲೇ ಚಿತ್ತ ಚೋರಿ ನಿನಗೆ
ಹೆಸರು ಗಿಸರು ಇಲ್ಲವೇ?
ಅತಿ ಅನಿಸಬಹುದು ನಾನು
ಕೆಟ್ಟಿರುವುದು ಸ್ವಲ್ಪವೇ!!

 

ಸೆಳೆವ ಕಣ್ಣ ಪಠ್ಯದೊಳಗೆ
ಇಂದ್ರಜಾಲ ಹಿಂಗದು
ನೆಟ್ಟ ನೋಟದಲ್ಲಿ ಕಲಿಯೆ
ಜೀವಮಾನ ಸಾಲದು!!

 

                - ರತ್ನಸುತ 

ಮೌನ ಪರಿಹಾರ

ಪ್ರವಾದಿಗಳು ಅಪ್ಪಣೆ ಹೊರಡಿಸಿದ್ದಾರೆ?
ಮರ್ಮಾಂಗದ ಮುಂದೊಗಲನ್ನು ಕತ್ತರಿಸಿ
ತಿಳಿ ನೀರಲ್ಲಿ ಅದ್ದಿ ಉಸಿರುಗಟ್ಟಿಸಿ
ತಲೆ ಬೋಳಿಸಿ ಗಂಧ ಲೇಪಿಸಿ
ಎದೆ ಸೀಳಿಕೊಂಡು ರಕ್ತ ಹರಿಸಿ

 

ಪ್ರವಾದಿಗಳು ಅಪ್ಪಣೆ ಹೊರಡಿಸಿದ್ದಾರೆ?
ಎಂಜಲಿನ ಮೇಲೆ ಹೊರಳಾಡಿ ಪುನೀತರಾಗಿ
ಅಸ್ತಿತ್ವವೇ ಮಾಯವಾಗುವಂತೆ ಮೈ ಮುಚ್ಚಿ
"ತಾನೊಬ್ಬನೇ" ಒಪ್ಪದವರನ್ನ ದ್ವೇಷಿಸಿ
ಬದುಕು ಕಟ್ಟುವ ಕ್ರಮವನ್ನೇ ಪಲ್ಲಟಗೊಳಿಸಿ

 

ಇವಷ್ಟೇ ಅಲ್ಲದೆ

 

ಪ್ರವಾದಿಗಳು ಸೂಚಿಸುತ್ತಾರೆ
 ಬದುಕಿ, ಬದುಕ ಕಲಿಸಿ, ಬದುಕಲು ಬಿಡಿ
ಹಸಿವನ್ನು ಆಲಿಸಿ, ವಿಷವನ್ನು ಸೋಲಿಸಿ
ಉಸಿರುಸಿರ ಸರದಿಯನ್ನೂ ಪ್ರೀತಿಸಿ
ಸ್ವಾರ್ಥವನು ಹಿಮ್ಮೆಟ್ಟಿ ಈಸಿ

 

ಪ್ರವಾದಿಗಳು ಅಂಗಲಾಚುತ್ತಿದ್ದಾರೆ
"ಸುಳ್ಳು ಪೋಷಾಕಿನಲ್ಲಿ ಆರಾಧಿಸದಿರಿ
ನನ್ನ ವಿವಸ್ತ್ರಗೊಳಿಸಿ ಹಿಂಬಾಲಿಸಿ
ಕಟ್ಟು ಕಥೆಗಳ ಚಿತೆಗೆ ದೂಡದಿರಿ
ಹಗೆತನದ ಕೊಳ್ಳಿಯಲಿ ಸುಡದಿರಿ"

 

ಯಾರೇ ಸತ್ತ ಕಾಲಕ್ಕೆ ಮೌನವಹಿಸುವಂತಾದರೆ

ಅನಾಚಾರದ ಅತಿರೇಕದ ಪ್ರಭಾವಕ್ಕೆ

ಪ್ರವಾದಿಗಳು ಕ್ಷಣ ಕ್ಷಣಕ್ಕೂ ಸಾಯುತ್ತಿದ್ದಾರೆ
ಎಲ್ಲವನ್ನೂ ಬದಿಗಿಟ್ಟು ಮೌನವಹಿಸೋಣ
ಮಾತಿನಿಂದಲೇ ಮನದ ಮನೆ ಹಾಳು!!

 

                                               - ರತ್ನಸುತ

ಬದುಕಿದಷ್ಟೂ ಕವಿತೆ

ಬಾನಿಂದ ಭುವಿಗಿಳಿವ ಮಳೆ ಹನಿ
ತನ್ನ ಅಸ್ತಿತ್ವ ಕಂಡುಕೊಳ್ಳುವ ತವಕದಲ್ಲೇ
ಕಮರಿಹೋದ ಕಥೆಗೆ
ಕಣ್ಣೀರು ಉರುಳಿದ್ದು ಸಮಂಜಸವೇ!!

 

ಚಿಗುರೆಲೆಯ ಮುಗುಳಲ್ಲಿ ಚದುರಿದವುಗಳ
ಅಳಲು ಕೇಳಿಬರುವುದಾದರೆ
ವಸಂತಗಳೆಂದೂ ಆಪ್ಯಾಯಮಾನವಾಗಿರದೆ
 ಅಪ್ಪಟ ದಳ್ಳುರಿಯಂತಿರುತ್ತಿದ್ದವು

 

ಅಲೆಗಳ ಬದುಕು ಸಾರ್ಥಕವಾಗುವುದು
ತೀರಕೆ ಒಮ್ಮೆಯಾದರೂ ಅಪ್ಪಳಿಸಿದಾಗ
ಮರಳ ಕೋಟೆ ಉರುಳಿಸಿದ ಪಾಪಕ್ಕೆ
ಶಾಪ ಹೊರುವ ಕನಸೂ ಬೀಳದಿರಲಿ ಅವಕೆ

 

ಧರೆಯ ಅಷ್ಟೂ ಚಾಚಿಕೊಂಡ ನೀಲಿ
ತಾನು ಸುಳ್ಳೆಂದು ನಂಬದ ಕಣ್ಣು
ರೆಕ್ಕೆ ಬಯಸಿದ್ದು ಹಾರಾಟಕ್ಕೆ ಹೊರತು
ನಂಬುಗೆಯ ಸಮರ್ಥಿಸಿಕೊಳ್ಳಲಲ್ಲ

 

ಬೆಳಕು ಎಳೆದದ್ದೇ ಬಣ್ಣ, ಎಳೆದಷ್ಟೇ ಬಿಲ್ಲು
ಸುಳ್ಳಾದರೂ ಮಾಯೆ ಮೆಚ್ಚುಗೆಗೆ ಆಪ್ತ
ನಿಜದ ಮೊಣಚು ಹಸಿ ಗಾಯಗಳು
ಭ್ರಮೆಯ ಲೇಪನದಲ್ಲಿ ಸುಧಾರಣೆ ಕಂಡವು

 

ಹಗಲುಗಳ ಮತ್ಸರಕೆ ಇರುಳಲ್ಲಿ ಉತ್ಸವ
ಸಾಲು ದೀಪಗಳಿನ್ನು ಸೋಲುಣುವುದಿಲ್ಲ
ನಶ್ವರ ನೆರಳನ್ನು ಶಾಶ್ವತಗೊಳಿಸುವುದು
ಶಾಶ್ವತ ನೋವನ್ನು ನಶ್ವರಗೊಳಿಸುವುದು!!

 

                                           - ರತ್ನಸುತ

ಇಷ್ಟು ದಿನದ ಪ್ರೇಮಕ್ಕೆ

ಜೀವ ಸೋಲಬೇಕು
ಇರುವಾಗ ನೀ ಜೊತೆ
ಅನುಮಾನ ಈಗ ನನಗೆ
ನನದೇನು ಈ ಕಥೆ?
ಇನ್ನಷ್ಟು ಸೋಲಬಲ್ಲೆ
ಗೆಲುವಾಗಿ ನೀನಿರೆ
ನಿನ್ನಲ್ಲೇ ನೆಲೆಸುವಾಸೆ
ನಾ ಕೊಚ್ಚಿಹೋದರೆ

 

ಬಲಹೀನನಾದೆ ಚೂರು
ನಿನ್ನೆಲ್ಲ ನೆನಪನು
ಹೊರಲಾಗುತಿಲ್ಲ ಹೃದಯ
ನೀ ನಂಬು ನನ್ನನು
ನೆಪಗಳಿಗೆ ಸಾಲುತಿಲ್ಲ
ಪೋಷಾಕು ಈಚೆಗೆ
ಕಟ್ಟುತ್ತ ಸೊಲ್ಲ ಮಾಲೆ
ಹಗುರಾಗಬೇಕಿದೆ

 

ಆ ರೆಪ್ಪೆ ಅಂಚಿನಲ್ಲಿ
ನೀ ಕಟ್ಟಿ ಹಾಕಿದೆ
ಒಂದೊಂದೇ ಪ್ರೇಮ ಕಾವ್ಯ
ನಾ ಬಿಡಿಸಿ ಓದಿದೆ
ಓದುತ್ತ ಬರೆದೆ ಹಾಗೇ
ನಾನೊಂದು ಕವಿತೆಯ
ಆಗಿಸಲೇ ಬೇಕು ಇದಕೆ
ಆ ಕಣ್ಣ ಪರಿಚಯ

 

ದಡದಲ್ಲಿ ಬಿದ್ದ ಹೆಜ್ಜೆ
ಗುರುತನ್ನು ಬಿಟ್ಟಿತು
ನೀ ಇಡದ ಹೆಜ್ಜೆಯಲ್ಲೂ
ಗುರುತೊಂದು ಮೂಡಿತು
ನೆರಳನ್ನು ತಡೆದು ಆಗ
ಯಾರೆಂದು ಕೇಳಿದೆ
ಎಲ್ಲವೂ ಅದಲು-ಬದಲು
ಮನದಲ್ಲೇ ನಾಚಿದೆ

 

ಗುಣಗಾನಕೀಗ ಕೊಂಚ
ಕಡಿವಾಣ ಹಾಕುವೆ
ಮಧುಪಾನಕೆಂದು ಅಧರ
ಹಸಿದಂತೆ ಕಾದಿವೆ
ಮುತ್ತೆಲ್ಲದಕ್ಕೂ ಮೊದಲು
ಮತ್ತೆಲ್ಲ ನಂತರ
ಕೊನೆಗಾಣೋ ಹಂತದಲ್ಲೂ
ಮುತ್ತೇ ಸುಸ್ವರ!!

                    

                   - ರತ್ನಸುತ

ಪುನರ್ಜನ್ಮ

ಪೊರೆ ಕಳಚಿ ಹೊಸತಾಗುವಾಗ
ಬೆತ್ತಲಾಗುವ ಭಯವಿಲ್ಲ
ನನ್ನ ಮುಖವಾಡವೂ ಕಳಚಿದೆ
ನಾನಾರೆಂಬುದಾರಿಗೂ ತಿಳಿಯದು

ಹೊಸತೊಂದು ಗುರುತು ಸಿಗಬೇಕಿದೆ
ಸಮರಕ್ಕೆ ಬೇಕಾದ ಶಸ್ತ್ರಾಸ್ತ್ರಗಳ
ಸಿದ್ಧಪಡಿಸಲೆಂದೇ ಕುಲುಮೆ ಹಚ್ಚಿದೆ
ಎಲ್ಲ ಆಯುಧಗಳ ಕಾಯಿಸಿ ತಟ್ಟಬೇಕು

ಸೋತ ಯುದ್ಧಗಳ ಪಾಠ ಕಲಿತು

 

ಸುಮ್ಮನೆ ಯಾರಂದರಾರೊಡನೆ ಕಾದಾಡಲಿ?
ಎದುರಾಳಿಯ ರಕ್ತ ಕುದಿಯಲು ಕಾರಣ ಬೇಕಲ್ಲ?
ಅದಕ್ಕಾಗಿಯೇ ಕ್ರೌರ್ಯ ರೂಢಿಸಿಕೊಂಡೆ
ಯಾರನ್ನೂ ಬಿಡದೆ, ಎಲ್ಲರನ್ನೂ ಎದುರುಹಾಕಿಕೊಂಡೆ
ಇಷ್ಟು ಸಾಕಿತ್ತು ಶತ್ರುಗಳು ಹುಟ್ಟಿಕೊಳ್ಳಲು

 

ಆಶ್ಚರ್ಯವೆಂಬಂತೆ ನನ್ನ ಜೊತೆ ಕೈ ಜೋಡಿಸಲು
ಪಳಗಿದ ಪಡೆಗಳೇ ಸಜ್ಜಾಗಿದ್ದ ಕಂಡೆ
ರಕ್ಕಸತನದ ಕೆಂಡಕ್ಕೆ ಸಿಕ್ಕ ಉರುವಲಾದೆ
ಅರೆ ಬೆಂದ ನಾನು ಚಟ-ಪಟ ಸದ್ದು ಮಾಡುತ್ತ
ಮೈ ಮುರಿದೆ ನೀಗದ ಹಸಿವಿನಿಂದ

 

ಆಚೆಯವರಲ್ಲಿ ಯಾವುದೇ ಆಯುಧಗಳಿರಲಿಲ್ಲ
ಕೇವಲ ಪ್ರಾರ್ಥನೆಗಳೇ ಕೇಳುತ್ತಿತ್ತು
ಅವರೆಲ್ಲ ನನ್ನ ವೈರಿಯೆನ್ನದೆ
ಹಠಕ್ಕೆ ಬಿದ್ದ ಮಗುವಂತೆ ಕಂಡದ್ದು
ನನ್ನ ಇನ್ನಷ್ಟು ಕೆರಳಿಸಿತು

 

ಸರಿಯಾಗಿ ಆಗಲೇ ಮಿಂಚು, ಗುಡುಗು ಸಹಿತ
ಮಳೆಗರೆಯಲು ಶುರುವಾಗಿದ್ದು
ನನ್ನ ಬೇಕುಗಳೆಲ್ಲ ತಣ್ಣಗೆ ನುಣುಚಿಕೊಂಡು

ಅನಿವಾರ್ಯವಾಗಿದ್ದ ಸಾವು ಸಂಭವಿಸಿದ್ದು

ಲೋಕದ ಕಣ್ಣಿಗೆ ನಾನು ಶವವಾಗಿದ್ದೆ
ಆದರೆ ನನ್ನೊಳಗಿನ ತೀರದ ಬಯಕೆಗಳು
ನನ್ನ ಪ್ರಾಣವನ್ನ ತಮ್ಮ ಮುಷ್ಠಿಯಲ್ಲಿ ಬಚ್ಚಿಟ್ಟಿದ್ದವು

ಮತ್ತೆ ಆಕಾರ ಪಡೆದು
ಸುಟ್ಟ ತೊಗಲ ಮೆಲ್ಲ ಸೀಳುತ್ತ ಹೊರ ಬಂದೆ
ಸುತ್ತಲೂ ಪ್ರಶಾಂತತೆ....

                                              

                                              - ರತ್ನಸುತ

ನೀ ಮೂಡಿದಾಗ ಮನದಿ ಮಾಯಾ ಚಳುವಳಿ

ನೀ ಮೂಡಿದಾಗ ಮನದಿ ಮಾಯಾ ಚಳುವಳಿ
ನೀ ನಗುವುದೇ ಹಿತವಾದ ಬಳುವಳಿ

(1)
ಒಮ್ಮೆಲೆ ನೀನು, ಅತಿಶಯವಾದರೆ
ತಾಳಲಿ ಹೇಗೆ ನಾ, ಮನಸಿನ ತೊಂದರೆ
ಹತ್ತಿರ ಬಾರದೆ ದೂರ ಉಳಿದಂತಿದೆ
ಈ ಹೃದಯವು ನಿನ್ನನೇ ಬೇಡಿ ಸಾಯುತ್ತಿದೆ

ನೀನಾಗಿ ಆಲಿಸೀಗ ಎಲ್ಲ ಮನವಿಯ
ತಡವ ಮಾಡದೆ
ಇನ್ನೊಮ್ಮೆ ಕಾಡಿಸು ಈ ಜೀವವನ್ನ
ನಿನ್ನಂಗೈಲಿಡುವೆ

ನೂರಾರು ಕನಸು ನೀನಾಗಿ ಬರಬೇಕು
ನೀರಾಗಿ ಹರಿವಾಸೆ ದಡವಾಗು ನನಗೆ!!

(2)
ಸರಿಯೇ ಇದು ಸರಿಯೇ
ದಿನವೆಲ್ಲ ನಿನ್ನದೇ ಸವಿಯೇ
ಒಂದಾಗಿ ಹಾರಿದಂತೆ
ಅನಿಸೋದು ಹೀಗೇತಕೆ?
ನಲಿವಾಸೆಯು ಏತಕೆ?
ಎದುರಾದರೆ ಈಗಲೇ
ಶರಣಾಗುವೆ ಕೂಡಲೆ
ಉಸಿರನ್ನೇ ದೋಚಿ ಕೊಡಲೇ?
"ಹೂ" ನೀಡು ಸಾಕು ಬೇಡ ಯಾವ ದೇಣಿಗೆ
ನೀ ಚೇತನ ಬರಿದಾದ ಬಾಳಿಗೆ

ತೀರಿಸು ಬಾ, ಈ ಬಿಕಾರಿ ಸಾಲವ
ರಾಜಿಯಾಗುತಲೇ ಒಂದಾಗಿ ಬಾಳುವೆ
ಇಂದಿಗೂ, ಎಂದಿಗೂ ಪ್ರೀತಿಯೇ ದೇವರು
ನಿನ್ನಲೂ, ನನ್ನಲೂ ಒಲವು ಒಂದೇ!!

ಮೌನದ ಸಮರದಿ ಸೋಲನು ಕಂಡು

Girl)
ಮೌನದ ಸಮರದಿ ಸೋಲನು ಕಂಡು
ಸರಹದ್ದುಗಳ ಒಳಗೇ ಉಳಿದು
ಚೀತ್ಕಾರದ ಚಿತ್ತಾರವು ಚೆದುರಿ
ನಡುವೆ ಬಿಕ್ಕಳಿಕೆಗಳಿಗೆ ಹೆದರಿ
ಕಂಬನಿಯೊಳಗೆ ಗೀಚಿದ ಸಾಲು
ಹರಿಯಿತು ಕೆನ್ನೆಯ ಸುಕ್ಕನು ಬಳಸಿ
ಕಾದೆವು ಉತ್ತರಗಳಿಗೆ ಈ ದಿನ
ಏಳುವ ಪ್ರಶ್ನೆಗಳಿಲ್ಲದೆ ಉಳಿದು

(Men/Responsible women)
ಕೊರಳಾಗುವೆವು ನಿಮ್ಮ ದನಿಗೆ
ನೆರಳಾಗುವೆವು ಅನವರತ
ಬದಲಾಗಲಿ ಈ ಬೆಳವಣಿಗೆಗಳು
ಸ್ವೇಚ್ಛೆ ನಿಮ್ಮದೇ ಆಗಿಸುತ

(Girl)
ಹೂವಿನ ಪಕಳೆಯ ಮೃದು ಭಾವನೆಯಲಿ
ಉಗುರಿನ ಗುರುತನು ಮರೆಸುವೆವು
ಇನ್ನೂ ಮೊಗ್ಗಿನ ನಿರ್ಮಲ ಮನದಲಿ
ಒತ್ತಾಯದಲೇ ಅರಳುವೆವು
ನರಳುವೆವು ಹೆಜ್ಜೆಜ್ಜೆಯಲೂ
ಹಿಂದಿರುಗಲು ಹೆದರುತ ಹಾದಿಯಲಿ
ಮರೆಸುವೆವು ಗಾಯಗಳ ನೋವನು
ಸಮಾಜ ನೋಟಕೆ ಅಂಜುತಲಿ

(Men/Responsible women)
ಭರಿಸುವೆವು ನಿಮ್ಮ ಭಾರವನು
ಹೊಣೆ ಹೊತ್ತು ಹಗುರಾಗಿಸುತ
ನೀಡುವೆವು ಅಭಯ ಹಸ್ತ ನಿಮಗೆ
ಹಾರಿರಿ ಆಗಸ ಮೀರಿಸುತ

(Girl)
ಅಕ್ಷರ ಕಲಿಸುವ ಗುರುಗಳೇ ಕೇಳಿ
ನಾವೆಂದಿಗೂ ನಿಮ್ಮಾಸರೆ ಬಳ್ಳಿ
ಅಪ್ಪ, ಅಮ್ಮ ನಂತರ ನೀವೇ
ದಾರಿ ದೀಪದ ಹಿತ ಬೆಳಕಲ್ಲಿ
ಬಂಧು, ಬಳಗ ನಿಮ್ಮೊಳಗೆಮ್ಮನು
ಉಳಿಸಿರಿ ನಗುವಿನ ಸಿರಿಯಾಗಿ
ಎಡವದ ಹಾಗೆ ನಡೆಸಿರಿ ನಮ್ಮನು
ಹಿಡಿಗೆ ಚಾಚಿದ ಬೆರಳಾಗಿ

(Men/Responsible women)
ಇರುವೆವು ನಿನ್ನ ರಕ್ಷಣೆಗೆ
ಸರಿಯಾದುದ ಕಲಿಸೋ ಶಿಕ್ಷಣಕೆ
ನೀ ನೀಡದ ಶಾಪಕೆ ಪ್ರತಿಯಾಗಿ
ನಾವಿರುವೆವು ನಿಮ್ಮ ಜೊತೆಯಾಗಿ

(Girl)
ಆಗುವಿರಾ ಹಾರಾಟಕೆ ನೀವು
ಬೆಂಬಲ ಸೂಚಕ ರೆಕ್ಕೆಗಳು
ಚುಕ್ಕಿಗಳಾಟಕೆ ಕರೆದಿವೆ ನಮ್ಮನು
ಕವಿದಿರೆ ಸುತ್ತಲೂ ಕಾರಿರುಳು
ನೀಡುವಿರಾ ನಿಮ್ಮೊಪ್ಪಿಗೆ ಕೂಡಲೇ
ಚಂದಿರನಂಗಳದಿ ಒಮ್ಮೆ
ಸುತ್ತಿ ಬರುವ ಆಸೆಯಾಗಿದೆ
ಒಬ್ಬಂಟಿತನದ ಹಂಗಿರದೆ

(Men/Responsible women)
ಹಾರು ಓ ಸ್ವತಂತ್ರ ಹಕ್ಕಿಯೇ
ಅನುಮಾನಗಳೇ ಇರದಂತೆ
ಇನ್ನು ಬದುಕ ನೀನೇ ರೂಪಿಸು
ಎಲ್ಲವೂ ನಿನ್ನಿಷ್ಟದಂತೆ....