ನೂರೊಂದು ಪ್ರಶ್ನೆಗಳು

ಅದೆಷ್ಟು ಇಂಪು ಹಿಂಜರಿಕೆಯ ಮೌನ?
ಅದೇಕೆ ನುಲಿವೆ ಸೋಕುವ ಮುನ್ನ?
ಅದೇನು ಸಣ್ಣ ನಗು, ಸಮ್ಮತಿ?
ಅದೆಲ್ಲಿ ಕಲಿತೆ ಕೊಲ್ಲುವುದನ್ನ?
ಮತ್ತೆ ಮತ್ತೆ ಬೇಡಿ ಪಡೆಯಬೇಕು ಪ್ರಾಣ!!

ಅದ್ಯಾವ ದಾರಿಯಲ್ಲಿ ನಿನ್ನ ತಿರುವು?
ಅದೆಷ್ಟು ರಮ್ಯ ನಿನ್ನ ಚೆಲುವು?
ಅದಾಗೇ ಮೂಡಿಬಂತೇ ಜೊನ್ನು,
ಅಥವ ಚಂದ್ರನೇನು ನಿನ್ನ ಕಣ್ಣು?

ಸ್ವಗತಗಳು ಸಾವಿರಾರು, ತೆರೆದಿಡುವ ಮುನ್ನ
ನಿನ್ನ ಸೆರಗು, ಅರ್ಥಾತ್ ದುಪ್ಪಟ್ಟ ಹಿಡಿ
ಅದೇಕೋ ಒಂದೇ ಹಠ
ಹಸ್ತಾಂತರಕೆ ತುದಿಗಾಲ ನಿಲುವು
ಹೆಸರಿಲ್ಲದೆ ಹುಟ್ಟಿದಂತಿದೆ ಒಲವು

ಅದು, ಇದು ಮಾತನಾಡಿ
ಯಾವುದೂ ನಿಲ್ಲಲಿಲ್ಲ ನನ್ನಲಿ, ನಿನ್ನಲಿ;
ನಿರೀಕ್ಷೆಯ ಹೊಂಡದಲ್ಲಿ
ತುಂಬು ನೀರ ನೀಳ ಬೇಸರ
ಮಿಂಚು ಹುಳು ಸಂಚರಿಸಲಿ
ಕದಡಿ ತರಂಗಗಳನೆಬ್ಬಿಸಿ
ನನ್ನಲಿ ಮತ್ತೆ ನಿನ್ನಲಿ!!

ಹೀಗೇಕೆ ಎದೆಗೊರಗಲು ಗೊಂದಲ?
ಬಾ, ಎಲ್ಲವ ಆಲಿಸು ನಿಧಾನಕೆ;
ಕೈ ಚಾಚು ದೂರ ನಿಂತ ನಿನ್ನನು
ಎಳೆದು ನಾಟಿಕೊಳ್ಳಲೇನು ಹೃದಯಕೆ?

-- ರತ್ನಸುತ