Friday, 20 February 2015

ಅಂದಕ್ಕೆ ಶರಣಾಗಿ

ಮುದ್ದಾದ ಮುಖದಲ್ಲಿ
ಸುಕ್ಕು ಚಿಂತೆಗಳನ್ನು
ಮರೆಸುವ ಔಷಧವ ನೀಡಲೇನು?
ಸುಡು ಬಿಸಿಲ ತಡೆವಂಥ

ಸಣ್ಣ ಮುಗಿಲಿಗೆ ಒಂದು
ಮನವಿ ಪತ್ರವ ಬೇಗ ಬರೆಯಲೇನು?

ಆದದ್ದು ಆಗಲಿ
ನಕ್ಷತ್ರಗಳ ಹೊಸೆದು
ಬಾನಂಗಳದಿ ಹೆಸರ ಬಿಡಿಸಲೇನು?
ಹೆಚ್ಚು ಹೊಳೆಯುವ ತಾರೆ

ಅಕ್ಕ ಪಕ್ಕ ಮಿನುಗಿ
ಒಂದು ನೀನಾಗು ಮತ್ತೊಂದು ನಾನು

ತೂಕಡಿಕೆಯ ತಡೆದು
ಏನ ಜಯಿಸುವೆ ಹೇಳು?
ಕನವರಿಸು ವರಿಸಿಕೊಂಡಂತೆ ನನ್ನ

ಉಸಿರ ಬಿಗಿಹಿಡಿಟ್ಟೆ
ಮನಸನ್ನು ತೆರೆದಿಟ್ಟೆ
ನನ್ನ ನೆರಳಾವರಿಸಿಕೊಳಲು ನಿನ್ನ

ಬಿಡುವಲ್ಲಿ ನೆನೆ ನನ್ನ
ಬಿಕ್ಕಳಿಸಿ ಸಾಯುವೆ
ಬಿಡಿಸಿಕೊಳ್ಳಲು ಆಗದಂತೆ ಕಾಡು
ನಿನ್ನ ಹಿಡಿದಿಡುವಲ್ಲಿ
ಸೋತವೆಲ್ಲ ಸಾಲು
ನಿನ್ನ ಕುರಿತು ಹೇಗೆ ಬರೆವೆ ಹಾಡು?

ಕಣ್ಣಾಚೆ ನೀ ದೂರ
ಕಣ್ಣೊಳಗೆ ಹತ್ತಿರ
ಹೆಣ್ಣಾಗಿ ವರ ಪಡೆದ ಶಿಲ್ಪ ಕನ್ಯೆ
ಸೋಲುವುದೇ ಪರಿಪಾಠ
ಅದರಲ್ಲೂ ಮಜವುಂಟು
ಆಸಕ್ತಿ ಮೂಡಿಸಿದೆ ಪ್ರೇಮ ವಿದ್ಯೆ

-- ರತ್ನಸುತ

No comments:

Post a Comment

ನೀರವ ಸ್ಥಿತಿಯಲ್ಲಿ ಯಾರಿವನೆನ್ನದಿರು

ನೀರವ ಸ್ಥಿತಿಯಲ್ಲಿ ಯಾರಿವನೆನ್ನದಿರು ನೀನಿರದೆ ಈ ಗತಿ ಸಿದ್ಧಿಸಿತು ಜೀವಕೆ ಹಾಡುಹಗಲಲ್ಲಿ ನೀ ಆವರಿಸಿಕೊಂಡಿರುವೆ ಕನಸೊಂದು ಬೀಳುತಿದೆ ಗೊತ್ತಿದ್ದೂ ಬಾವಿಗೆ ಬ...