Friday, 20 February 2015

ಚಂದಿರನೊಡನೆ

ಉದಯಿಸಿದವು ಒಂದೊಂದೇ ಚುಕ್ಕಿ
ಬಿಕ್ಕಿರಲು ಒಬ್ಬಂಟಿ ಚಂದ್ರ
ಕಣ್ಣಿನಲಿ ಪ್ರಜ್ವಲಿಸುತಿತ್ತು
ಹವಣಿಕೆಯ ಒಟ್ಟಾರೆ ಚಿತ್ರ

ಹಿತ್ತಲಿನ ಕಗ್ಗತ್ತಲೇಕೋ
ಬಿಳಿ ಸೀರೆ ಉಟ್ಟಂತೆ ಭಾಸ
ಬೇಕೆಂದು ತೆರೆ ಮರೆಗೆ ಸರಿದು
ಚಂದಿರ ಮಾಡುವನು ಮೋಸ

ಮುರಿದ ಚುಕ್ಕಿಗಳಿಗೆ ಪಾಪ
ಬಯಕೆಗಳ ಸೆರೆಹಿಡಿವ ಶೋಕಿ
ನಿಂತಲ್ಲೇ ಮಿನುಗಬೇಕು ತಾನು
ಪ್ರತಿಮೆಗಳ ಪ್ರಾಸಕ್ಕೆ ಸಿಕ್ಕಿ

ದೂರುತಿದೆ ಚಂದ್ರ ಸುರಿದ ಜೊನ್ನು
ಕಡಲ ಅಲೆ ತುಂಟಾಟವಾಡಿ
ಮರಳಿಗೂ ರೋಸೆದ್ದು ಹೋಯ್ತು
ಬಿಡಿಸಲಾಗದ ಜಗಳ ನೋಡಿ

ವಿರಹಿಯ ಕರೆಯೋಲೆಯೊಂದು
ಗಾಳಿಗೂ ಹುಚ್ಚಿಡಿಸಿದಂತೆ
ಮುದಿ ಮರದ ಕೊಂಬೆ ಕೊಂಬೆಗಳಿಗೆ
ಉದುರಿದ ಎಲೆಗಳದೇ ಚಿಂತೆ

ಕಂಬಳಿ ಹೊದಿಸಿಟ್ಟ ಕನಸು
ಎಚ್ಚರಗೊಳ್ಳುತ್ತ ಮುಂದೆ
ಇಟ್ಟಿತು ಹೆಜ್ಜೆ ಮೇಲೆಜ್ಜೆ
ತೂಕಡಿಕೆಯ ಹೊತ್ತು ಹಿಂದೆ

ಮಧ್ಯ ರಾತ್ರಿಯ ಎಚ್ಚರಕೆ
ಕಿಟಕಿಯಾಚೆ ಇಣುಕೋ ಚಡಪಡಿಕೆ
ಬಾನ ಜರಡಿಯ ಕೆಳಗೆ
ಬೆಳ್ಳಿ ತರಂಗಗಳ ಮನವರಿಕೆ

ಚಂದ್ರ ಹಗಲ ಸ್ವಪ್ನ
ಇರುಳು ಬೆಳಕ ಬೆನ್ನು
ಬದುಕು ಸೀಮೆರಹಿತ ಯಾನ
ಕನಸು ಅದರ ಕಣ್ಣು!!

-- ರತ್ನಸುತ

1 comment:

  1. ಸೋಸು ಜರಡಿಯಿಂದಳಿವ ತಾರೆಗಳ ಮೇಳವೇ ಇರುಳು.

    ReplyDelete

ನೀರವ ಸ್ಥಿತಿಯಲ್ಲಿ ಯಾರಿವನೆನ್ನದಿರು

ನೀರವ ಸ್ಥಿತಿಯಲ್ಲಿ ಯಾರಿವನೆನ್ನದಿರು ನೀನಿರದೆ ಈ ಗತಿ ಸಿದ್ಧಿಸಿತು ಜೀವಕೆ ಹಾಡುಹಗಲಲ್ಲಿ ನೀ ಆವರಿಸಿಕೊಂಡಿರುವೆ ಕನಸೊಂದು ಬೀಳುತಿದೆ ಗೊತ್ತಿದ್ದೂ ಬಾವಿಗೆ ಬ...