Friday, 20 February 2015

ಅಪರಿಚಿತ ಪ್ರೇಮ

ಆಕೆ ಯಾರೋ ಅಂದುಕೊಂಡು
ನನ್ನ ತಡೆದು ಕೈ ಹಿಡಿದಳು
ಜೀವವೇ ಅವಳ ಕೈವಶವಾಯಿತು
ಸ್ಪರ್ಶ ಸುಖವೇ ಅಪ್ರತಿಮವೆನಿಸಿತು

ಆಕೆ ಹೆದರಿದಳು ನಿಜ
ಎಷ್ಟೇ ಆದರೂ ಹೆಣ್ಣು
ಅಂಜಿಕೆಯ ತೋರ್ಪಡಿಕೆ ಸಹಜ;
ನಾನೋ ಒಳಗೊಳಗೇ ಕಂಪಿಸುತ್ತಿದ್ದೆ

ಹೊರಗೆ ಸಹಜವಾಗಿ ನಟಿಸಿ
ಸೋತು ಹೋದೆ ಕೊನೆಗೆ
ಆಕೆಯ ತೊದಲು ನುಡಿ "Sorry"ಗೆ

ಇನ್ನೂ ರಿಂಗಣಿಸಿದೆ ಅವಳ ದನಿ
ಶಂಖದೊಳಗಿನ ನಿನಾದದಂತೆ;
ಅವಳ ಹಿಡಿಯ ಜಾಗದ ರೋಮಗಳು

ಎದ್ದೆದ್ದು ಕುಣಿದಂತೆ
ಈಗಷ್ಟೇ ದಣಿದಂತೆ
ಮನಸೆಲ್ಲ ಅವಳಂತೆ!!

ಕಣ್ಣು ಮುಚ್ಚಿದರೆ
ಅವಳ ಅಧರವೇ ಕಾಣುವಾಗ
ತುಟಿ ಚಿಲಕ ಮೆಲ್ಲಗೆ ತೆರೆದು
ಹಾಡೊಂದ ಹಾಡುತ್ತೇನೆ
ಅವಳ ಓರೆಗಣ್ಣನು ತಾಕಿ ಬರಲು,
ಪರಿಚಯಕ್ಕೊಂದು ನೆಪವ ಕೊಡಲು


ಇರುಳುಗಳು ಒಂದಿಷ್ಟು ಪೋಲಿಯಾಗಿ
ಬರೆದ ಹಾಳೆಗಳೆಲ್ಲ ಖಾಲಿಯಾಗಿ
ಸ್ಥಿತಿ ತಲುಪಿದಾಗ
ಹಾಗೇ ಒಮ್ಮೆ ಎದುರಾಗಿ ಕೇಳುತ್ತಾಳೆ
"Hey, How are you?"


-- ರತ್ನಸುತ

No comments:

Post a Comment

ನನ್ನ ಕನಸು

ಪಕ್ಕದಲ್ಲೇ ನನ್ನ ಕನಸಿಗೆ ನಿದ್ದೆ ಹೊದಿಸಿ ನಾ ಎಚ್ಚರಗೊಂಡಿರುತ್ತೇನೆ ತೂಗು ತೂಕಡಿಕೆಯಲಿ, ನಡು ರಾತ್ರಿ ಮಂಪರಲಿ ... ಪೂರ್ತಿ ಮೈ ಮರೆಯದೆ, ಗೊರಕೆ ಹೊಡೆಯದೆ ಕೈ-ಕಾ...